सूर्यनारायण एच पेलिस

मेरो त्यो मातृभूमिको ऋण अझै तिर्न नसकेर
आजित छु आज म आफ्नै देश फिर्न नसकेर

माटोको टीका लगाई आउँछु भनी हिँडेँ
कागझैँ घुम्दै छु यता कुहिरो चिर्न नसकेर

बालापनले न चिन्दा गाढा मनले न बुझ्दा
किनारामै छु यहाँ मूलबाटो छिर्न नसकेर

गाउँमा गुँड भत्क्यो रे शून्य शून्य लेकबेसी
रुन्छु यसै स्मृतिका पानाबाट गिर्न नसकेर

ठाँटिएर दौरा सुरुवाल गर्वले भिर्न नसकेर
आजित छु म आफ्नै भेषमा फिर्न नसकेर ।
(म्याग्दे–६, तनहुँ)