तेहरान । इरानको विदेश मन्त्रालयका प्रवक्ता इस्माइल बाघाईले रूसलाई क्षेप्यास्त्र तथा ड्रोन हस्तान्तरण गरेको आरोपमा आफूमाथि युरोपेली संघ र बेलायतले लगाएको प्रतिबन्धको कडा निन्दा गरेका छन् ।   

इरानमाथि लगाएको प्रतिबन्धलाई अन्यायपूर्ण र अन्तर्राष्ट्रिय कानुनी सिद्धान्त र मानवअधिकार विपरीत रहेको आशय व्यक्त गर्दै जारी गरिएको विज्ञप्तिमा बाघाईले प्रतिबन्ध आधारहीन रहेको उल्लेख गरेका छन् ।   

आरोप र प्रतिबन्ध आधारहीन रहेको बताउँदै बाघाईले द्वन्द्व सुरु भएदेखि नै इरानले युद्ध र द्वन्द्वको विरोध गर्दै रूस र युक्रेनबीचको मतभेदको कूटनीतिक समाधानका लागि आह्वान गर्दै आएको बताएका छन् । 

गाजा र लेबनानमा भएको नरसंहारमा इजरायललाई हतियार उपलब्ध गराउन बेलायत र जर्मनीलगायत केही युरोपेली देशहरूको संलग्नतालाई औंल्याउँदै उनले ती देशहरू प्यालेस्टिनी र लेबनानी जनताविरुद्ध इजरायलले गरेको “अपराध“ मा सहयोगी रहेको बताएका छन् ।

यसै सन्दर्भमा इरानको राष्ट्रियहीत, सुरक्षा, सार्वभौमिकता र क्षेत्रीय अखण्डताको रक्षा गर्न रूसलगायत अन्य देशहरूसँग सैन्य सहयोगमा संलग्न हुने 'अपरिहार्य' अधिकारलाई  प्रकाश पार्दै युरोपेली संघको 'अवैध र अन्यायपूर्ण' प्रतिबन्धहरूविरुद्ध जवाबी प्रतिक्रिया दिने अधिकार सुरक्षित रहेको समेत बाघाईले उल्लेख गरेको छ । रासस/सिन्ह्वा