ढाका । बंगलादेशमा डेंगी संक्रमणबाट थप नौजनाको मृत्यु भएको शनिबार रिपोर्ट गरिएको छ । यो यस वर्षको सबैभन्दा उच्च दैनिक मृत्युदर हो । जनवरीदेखि हालसम्म डेंगी संक्रमणबाट मृत्यु हुनेको संख्या २१० पुगेको जनाइएको छ  ।

सेप्टेम्बरमा ८० जनाको मृत्यु भएको थियो । चालु महिनामा हालसम्म ४७ जनाको मृत्यु भइसकेको बंगलादेशको स्वास्थ्य सेवा महानिर्देशनालय (डीजीएचएस)ले जनाएको छ ।

डीजीएचएसका अनुसार, पछिल्लो २४ घण्टामा डेंगीका ९१५ नयाँ संक्रमण पुष्टि भएको छ । यो महिनाको कुल संक्रमण संख्या १० हजार ८७२ पुगेको छ ।

यो वर्ष हालसम्म ४१ हजार ८१०  डेंगीका घटना दर्ता गरिएको डीजीएचएसले जनाएको छ । थप फैलावट रोक्न बंगलादेशी स्वास्थ्य अधिकारीले लामखुट्टे नियन्त्रण ‘अपरेसन’ सञ्चालन गरिने जनाएका छन् ।

बंलादेशमा सन् २०२३ मा डेंगी सक्रमणबाट एक हजार ७०५ जनाको मृत्यु भएको थियो । त्यो हालसम्मको सबैभन्दा उच्च वार्षिक मृत्यु संख्या हो ।

डेंगी संक्रमित एडिस जातको लामखुट्टेको टोकाइबाट सर्ने भाइरल रोग हो । डेंगी लागेका बिरामीमा टाउको दुख्ने, उच्च ज्वरो आउने,  मांसपेशी र जोर्नी दुख्ने, बान्ता हुनेजस्ता लक्षण देखा पर्छ । रासस/सिन्ह्वा