गाजा । उत्तरी गाजाको जबलिया शरणार्थी शिविरमा इजरायली सेनाले आफ्नो सैन्य कारबाहीलाई तीव्र पार्दा विगत २४ घण्टामा कम्तीमा ३३ प्यालेस्टाइनीको मृत्यु हुनुका साथै दर्जनौँ घाइते भएका छन् ।

गाजाको सिभिल डिफेन्स अथोरिटीले एक प्रेस विज्ञप्तिमा इजरायली युद्धक विमानहरूले जबलिया क्षेत्र र यसको शिविरमा बमबारी गरेको जनाएको छ ।

स्थानीय स्रोत र प्रत्यक्षदर्शीका अनुसार, इजरायली सेनाले घरघरमा व्यापक बमबारी सञ्चालन गर्‍यो र ठूलो विस्फोट गराएको थियो । यहाँ बालबालिका र महिलासहित २५ प्यालेस्टाइनीको शव निकालिएको र ९६ जना घाइते भएका चिकित्सा टोलीले सिन्ह्वालाई बताएको छ ।

एक विश्वव्यापी चिकित्सा परोपकारी संस्था डाक्टर्स विदाउट बोर्डर्सले शुक्रबार विज्ञप्ति जारी गर्दै इजरायलको सैन्य कारबाहीका कारण हजारौँ प्यालेस्टाइनी अझै पनि जबलिया क्षेत्रमा फसेका जनाएको छ ।

गाजामा जारी इजरायली आक्रमणबाट मृत्यु हुने प्यालेस्टाइनीको संख्या ४२ हजार १७५ पुगेको छ । रासस/सिन्ह्वा