तेहरान । इरानले सम्भावित इजरायली आक्रमणको जवाफ दिने योजना तयार पारेको स्थानीय सञ्चारमाध्यमले आइतबार जनाएको छ ।

“इजरायलद्वारा सम्भावित आक्रमणको आवश्यक प्रतिक्रियात्मक योजना पूर्ण रूपमा तयार गरिएको छ,” सशस्त्र सेनाको सूचना उद्धृत गर्दै तस्निम समाचार एजेन्सीले उल्लेख गरेको छ ।

इस्लामिक रिभोलुसनरी गार्ड कर्प्स (आईआरजीसी)ले मंगलबार तेहरानसँग सम्बद्ध समूहका नेताहरू आक्रमणमा मारिएको प्रतिशोधमा इजरायलमा करिब २०० मिसाइल आक्रमण गरेको थियो ।

“यदि, इजरायलले आक्रमण गरे इरानले प्रत्याक्रमण गर्नेछ भन्नेमा कुनै शंका हुने छैन,” तस्निमले भनेको छ ।

बेरुतमा इजरायली हवाई हमलामा हिजबुल्लाह प्रमुख हसन नसरल्लाह र आईआरजीसीका शीर्ष जनरल अब्बास निलफोरोसन हत्याको बदलामा मंगलबार इरानले इजरायलमाथि दोस्रो प्रत्यक्ष मिसाइल आक्रमण गरेको हो ।

विदेशमन्त्री अब्बास अराघचीले शनिबार इजरायली आक्रमणको बदलामा इरानले आनुपातिक वा अझै कडा प्रतिक्रिया दिन सक्ने चेतावनी दिएका थिए ।

इरानको तेल सुविधाजस्ता महत्त्वपूर्ण स्थललाई लक्षित गर्ने सम्भावित इजरायली हवाई आक्रमणको चिन्ताका बीच त्यहाँका तेलमन्त्री मोहसेन पाकनेजादले आइतबार खार्ग टापुस्थित एउटा तेलस्थलको भ्रमण गरेका छन् ।

अमेरिकी राष्ट्रपति जो बाइडेनले शुक्रबार इजरायललाई विश्वका १० ठूला तेल उत्पादकमध्ये एक इरानको तेल साइटलाई लक्षित आक्रमण नगर्न सल्लाह दिएका छन् । रासस/एएफपी