काठमाडौं । रमेश क्षितिजको कथा संग्रह ‘एउटा मायी नगरमा’ लोकार्पण भएको छ । शुक्रबार राजधानीमा आयोजित एक समारोहमा उनका पिता पवित्रराज न्यौपानेद्वारा संग्रहको लोकार्पण गरिएको हो । 

कथा संग्रहबारे टिप्पणी गर्दै लेखक कुमार नगरकोटीले नेपाली कथा लेखनमा क्षितिजको प्रवेश कथाको नयाँ क्षितिज भएको बताए । उनले भने, “सामाजिक यथार्थदेखि अतियथार्थ, म्याजिकल रियालिज्मदेखि एआईको दुनियासम्मका १७ वटा फरक कथाले पाठकलाई छुट्टै मात दिन्छन् । कथा भन्ने शैली, लेखनको भाषा र पात्र, परिवेश र चरित्र चित्रण सर्वथा नौलो छ । यी कथा पढेर म चकित र प्रसन्न भएको छु ।”

कथा पढ्नुअघि आफूले अति प्रेमले पढेको कविले कतै कथा पठनपछि निराश पो बनाउने हो कि भनेर डराएको पनि त्यस्तो नभएको उनले बताए । पढिसक्दा कथा संसारमा यसरी पनि प्रवेश गर्न सकिने रैछ र कथा यसरी पनि भन्न सकिने रैछ भन्ने बोध भएको बताए । 

“एउटा मायी नगरमाका कथा साँच्चै जादुयी छन् । नेपाली आख्यान लेखनमा क्षितिजको प्रवेशले अर्को एउटा मानक खडा गर्नेछ,” उनले भने । 

समारोहमा आफ्नो कथा लेखनको यात्रा निकै लामो भए पनि बीच–बीचमा कथाकार रमेश क्षितिज हराएको टिप्पणी लेखक क्षितिजले गरे ।

बुकहिलले प्रकाशन गरेको १७ वटा फरक कथाहरूको यस संग्रहको मुद्रण पनि कलर थिमअनुसार गरिएको छ । २७२ पृष्ठको हार्ड कभर पुस्तकको मूल्य ७५० रुपैयाँ रहेको छ ।