काठमाडौं । गएको असोज ११ र १२ गते आएको बाढी, पहिरो र डुबानका कारण बाली तथा पशुपन्छी क्षेत्रमा करिब ६ अर्ब रुपैयाँ बराबरको क्षति भएको छ । कृषि तथा पशुपंक्षी विकास मन्त्रालयले सार्वजनिक गरेको प्रारम्भिक क्षतिको विवरणअनुसार पाँच अर्ब ८३ करोड रुपैयाँ बराबरको क्षति भएको देखिएको छ ।

अविरल वर्षाले बाढी, पहिरो र डुबानका कारण बाली, पशुपन्छी तथा मत्स्य उत्पादन, खेतीयोग्य जमिन, कृषिसम्बन्धी पूर्वाधार, आपूर्ति श्रृंखला साथै अन्य क्षेत्रमा ठूलो क्षति भएको मन्त्रालयले जनाएको छ ।

मन्त्रालयका अनुसार सप्तरी, सिरहा, धनुषा, महोत्तरी, सर्लाही, रौतहट, बारा, पर्सा, नवलपुर, बागलुङ, खोटाङ, झापा, कैलाली, कास्की, स्यांजा, सिन्धुली, मकवानपुर, काभ्रे जिल्लामा ५८ हजार ४७६ हेक्टर धानवाली नष्ट भएको छ । उक्त क्षेत्रमा तीन अर्ब ५० करोड बराबरको क्षति भएको मन्त्रालयले सार्वजनिक गरेको तथ्यांकमा उल्लेख छ ।

खोटाङमा १३ सय हेक्टर अलैची खेती नष्ट हुँदा ७० करोड बराबरको क्षति भएको छ । पर्सामा ३४ करोड मूल्य बराबरको ८५ हजार हेक्टर उखुखेती नष्ट भएको छ । धनुषा, महोत्तरी, सर्लाही, रौतहट, बारा र पर्साका ४५६ हेक्टर माछापोखरीमा क्षति हुँदा एक अर्ब ३३ करोड रुपैयाँ बराबरको क्षति भएको छ ।  पाँचथर, धनकुटा, तेह्रथुमका २४ पशुगोठमा क्षति भएको छ । पाँचथर, इलाम, सुनसरी, धनकुटा, सोलुखुम्बु, ओखलढुंगा, रामेछाप, दोलखा, ललितपुर, मधेस प्रदेशका सबै जिल्लामा २६ हजार २०५ पशुपन्छी मरेका छन् ।

कास्की, नवलपरासी पूर्व, कञ्चनपुर रौतहटको २२ हेक्टर फलफूल बगैंचामा क्षति पुगेको छ । खोटाङ, मकवानपुर, चितवन, सप्तरी, सिरहा, धनुषा, बारा, पर्सा जिल्लाका चार हजार ७४३ हेक्टर तरकारी बालीमा नष्ट भएको छ । दुईवटा कोल्डस्टोरमा क्षति भएको छ ।

लालबन्दी, गोदावरी, खुमलटार, मुसीकोट, फिकल कीर्तिपुर, मार्फा, नवलपुर लगायतमा १६ करोड बराबरको मन्त्रालय र मातहतको कार्यालयको भौतिक तथा अन्य संरचनामा क्षति भएको मन्त्रालयले जनाएको छ ।