काठमाडौं । प्रधानमन्त्री केपी शर्मा ओलीले अविरल वर्षापछि बाढीपहिरो गएको भन्ने बित्तिकै आफू अमेरिकाबाट निस्किएको बताएका छन् । सिंहदरबारमा मंगलबार आयोजित पत्रकार सम्मेलनमा उनले देशमा विपत्ति हुँदा बाहिर गएको भनि प्रश्न उठाएको सुनाए । 

आफू अमेरिकामा हुँदा पनि मन्त्रीहरूबाट जानकारी लिइरहेको सुनाए । देशमा विपद् पर्दा प्रधानमन्त्री तत्काल नफर्केको भनि आलोचना भइरहेको छ । 

सो विषयमा प्रधामन्त्रीको प्रष्टिकरण उनकै शब्दमा–

म बाहिर थिएँ । यसको अर्थ म जानकार थिइनँ भन्ने होइन । संयुक्त राष्ट्रसंघको महासभामा असोज १० गते सम्बोधन गर्नका लागि गएको हुँ । त्योभन्दा अगाडि नै यस वर्षको संयुक्त राष्ट्रसंघको महासभाको मुख्य विषय फ्युचर समिट थियो । जसमा जेनेरल डिभेट, विभिन्न सेगमेन्टहरू थिए, अगाडिदेखि नै जानुपर्थ्यो ।

म जानु अगााडि त प्राकृतिक विपत्ति भएको होइन । यहाँ मन्त्रीजीहरूसँग कुराकानी भइरहेको थियो । तर, मलाई पनि यसप्रकारको अनुमान थिएन । असोज ११ र १२ गते पानी परेपछि नै म आउने तयारीमा थिए । १२ गते पानी पर्दापर्दै म अमेरिकाबाट हिडेँ । म यहाँ भइनँ भन्ने कुरा मान्छेले उठाए । बाढीपहिरो आयो भन्ने बित्तिकै १२ गते बिहान हिँडेको छु । आइपुग्दा एक दिन ग्याप हुन्छ । प्लेनको प्लेन नै १४ गते लाग्यो ।