काठमाडौं । थोरै लेख्ने तर गम्भीर र गहिरो कविता लेख्ने कवि तथा नेपाल प्रज्ञा प्रतिष्ठानका पूर्वउपकुलपति डा. विष्णुविभु घिमिरेको नयाँ कविताकृति ‘हुरीको इन्द्रेणी उक्लेर’ प्रकाशनमा आएको छ ।

घिमिरेको यस कविताकृतिमा मानव जीवनका विविध विषयमाथि लेखिएका ४६ वटा लामाछोटा कविता समेटिएको छ । कवि घिमिरेका समकालीन मित्रहरू दिनेश अधिकारी, तीर्थ श्रेष्ठ, अविनाश श्रेष्ठ र अशेष मल्लले कृतिभित्र भूमिका लेखेका छन् ।

कृतिमा अग्रज कवि बैरागी काइँलाले पनि भूमिका लेखेका छन् । भूमिकामा काइँलाले लेखका छन्, ‘नेपाली कविताको लोकप्रिय समकालीन काव्यधाराका एकजना प्रमुख र लोकप्रिय कवि हुन् विष्णुविभु घिमिरे ।’

कविता लेखनमा पाँच दशक बिताएका घिमिरेको काव्यिक क्षेत्रमा विशिष्ट पहिचान छ । उनका ‘काँडाकाँडामा टेकेर’ र ‘कठघरामा उभिएर’ नेपाली कविता साहित्यका चर्चित कृति हुन् । 

उनको तेस्रो कृति ‘हुरीको इन्द्रेणी उक्लेर’ माया पब्लिकेसनले प्रकाशनमा ल्याएको हो ।