काठमाडौं । शनिबारको बाढीले जलविद्युत् क्षेत्रमा मात्रै साढे दुई अर्ब बराबरको क्षति भएको ऊर्जा जलस्रोत तथा सिँचाइ मन्त्रालयले जनाएको छ । २६ वटा जलविद्युत् आयोजनाको प्रारम्भिक निरीक्षणमा दुई अर्ब ४५ करोडको क्षति भएको मन्त्रालयले जनाएको छ ।

आइतबार पत्रकार सम्मेलन गर्दै मन्त्रालयले क्षतिसम्बन्धी विवरण एवं तथ्यांकहरू प्राप्त हुने क्रम जारी रहेको हुँदा अझै बढ्ने मन्त्री दीपक खड्काले जानकारी दिए ।

मन्त्रालयका अनुसार, ६२५.९६ मेगावाट जडित विद्युत् क्षमताको ११ वटा सञ्चालनमा रहेका जलविद्युत् आयोजनाहरूमा क्षति भएको जनाएको छ । यस्तै, ११ सय मेगावाट बिजुली उत्पादन रोकिएको छ । १०१०.२९ मेगावाट क्षमताको १५ वटा निर्माणाधीन जलविद्युत् आयोजनाहरूमा क्षति भएको छ ।

मन्त्रालयका अनुसार, ४५६ मेगावाट क्षमताको माथिल्लो तामोकोसी जलविद्युत् आयोजनाको बाँधस्थलको कन्ट्रोल रुम पूर्ण क्षति भएको र चार जनाकर्मचारी समेत सम्पर्कविहीन भएका छन् ।

निर्माणाधीन २१६ मेगावाटको अपर त्रिशूली–१ क्याम्प हाउस र पहुँचमा क्षति पुगेको छ । सञ्चालनमा रहेको २२ मेगावाट क्षमताको वाग्मती साना जलविद्युत् आयोजनाको विद्युत् गृहमा पूर्ण क्षति पुगेको छ ।

गत वर्षको बाढीबाट प्रभावित भएको २२.१ मेगावाट क्षमताको तल्लो हेवाखोलाको विद्युत् गृह डुबानमा परेको छ । पुनः निर्माण सकेर सञ्चालनमा आउनै लाग्दा १४.९ मेगावाटको हेवा खोला ‘ए’ क्षतिग्रस्त भएको छ ।

८६ मेगावाटको सोलु दूधकोसी आयोजनाको हेडवर्क्समा क्षति पुगेको छ । तीन मेगावाट क्षमताको माइखोला क्यास्केड जलविद्युत्‌को बाँध र टेलरेसमा क्षति भएको छ ।

९.६ मेगावाट क्षमताको माइखोला जलविद्युत् आयोजनाको बाँध र प्रसारण लाइनमा क्षति पुगेको छ । एक मेगावाट क्षमताको फेमेखोला जलविद्युत्‌को बाँध र विद्युतगृहमा पूर्णरूपमा क्षति पुगेको छ ।

पाँच मेगावाट क्षमताको सिउरीखोला जलविद्युत् आयोजनाको टेलरेस र टनेलमा क्षति पुगेको छ । ४० मेगावाट क्षमताको सुपरन्यादी जलविद्युत् आयोजनाको पुहँच मार्ग र प्रोटेक्सन वालमा क्षति पुगेको छ । २५ मेगावाट क्षमताको इलेप खोला पहुँचमार्गमा क्षति पुगेको छ ।

निर्माणाधीन पाँच मेगावाट क्षमताको हेवाखोला जलविद्युतको प्रसारण लाइनको टावर तथा पहुँच मार्गमा क्षति पुगेको छ । १५.१ मेगावाट क्षमताको सभाखोला ‘बी’ जलविद्युत् आयोजनाको पावर हाउस परिएको र बाँधमा क्षति भएको छ । ६.३ मेगावाट क्षमताको सभाखोला ‘सी’ पहुँचमार्गमा क्षति पुगेको छ । ८६.५९ मेगावाट क्षमताको लान्द्रुक मोदी जलविद्युत्  पहुँचमार्गमा क्षति पुगेको छ ।

१०० मेगावाट क्षमताको सुपर त्रिशूली जलविद्युत् आयोजनाको तीन ट्रिपर, दुई स्काभेटर बगाएको छ । यस्तै, २० मेगावाट क्षमताको लाङटाङ खोला जलविद्युत् आयोजनाको बाँध, क्याम्प हाउस र पहुँचमार्गमा क्षति पुगेको छ ।

दुई मेगावाट क्षमताको खानी खोला जलविद्युत् आयोजनाको प्रसारण लाइनको टावर ढलेको छ । ४.३६ मेगावाट क्षमताको टुङ्गुन ठोस्ने आयोजनाको पावर हाउस डुबेको छ ।

१४.९ मेगावाट क्षमताको माया खोला जलविद्युत् आयोजनाको बाँध र पहुँचमार्गमा क्षति पुगेको छ । ९९.४ मेगावाटको लाप्चे खोला जलविद्युत् आयोजनाको पुहँच मार्ग, क्याम्प क्षेत्रमा क्षति भएको छ ।

४० मेगावाट क्षमताको भोटेकोसी–१ जलविद्युत् आयोजनाको सुरुङ मार्गमा क्षति पुगेको छ । ८२ मेगावाट क्षमताको तल्लो सोलु आयोजनाको विद्युत् गृह र बाँधस्थलमा पहिरो गएको छ । १४० मेगावाट क्षमताको तनहुँ जलविद्युत् निर्माण स्थलमा पानी जमेको छ ।

१२० मेगावाट क्षमताको रसुवा भोटेकोसी जलविद्युत् आयोजनाको निर्माण सामाग्रीहरू बगाएको छ ।

प्रसारण लाइनतर्फ

प्रसारण लाइनतर्फ काबेली कोरिडोर अन्तर्गत दमक–गोदक १३२ केभी प्रसारण लाइनको तीन वटा टावरमा क्षति पुगेको छ ।

खिम्ती–लामोसाँगु १३२ केभी प्रसारण लाइनको दुईवटा टावरमा क्षति पुगेको छ । सोलु कोरिडोर प्रसारण लाइनको केही सब–स्टेसनमा क्षति पुगेको छ ।