काठमाडौं । काठमाडौं महानगरपालिकाभित्र विभिन्न ११ ब्रान्डका पानीमा फिकल कोलिफर्म भेटिएको छ ।

महानगरपालिकाको टोलीले गरेको अनुगमन र परीक्षणका क्रममा ११ ब्रान्डका पानी पिउन अयोग्य पाइएपछि बिक्री–वितरणमा रोक लगाइएको छ । बिक्रीमा रोक लगाइएका हरेकलाई दुई लाख रुपैयाँ जरिवाना गरिएको महानगरले जनाएको छ ।

महानगरले गएको भदौ १२ देखि २८ गतेसम्मको अनुगमनका क्रममा २१ पानीको नमुना लिएको थियो । ती नमुना काठमाडौं उपत्यका खानेपानी लिमिटेडको प्रयोगशालामा परीक्षण गर्दा कोलिफर्म रहेको पुष्टि भएको थियो ।

प्रति १०० मिलिलिटर नमुना परीक्षणमा कोलोनी फर्मिङ युनिट (सीएफयू) मापदण्डविपरीत देखिएको हो । कोलोनी फर्मिङ युनिट (सीएफयू) सूक्ष्मजीवको अवस्था हेर्न प्रयोग गरिने युनिट हो ।

खाद्यपदार्थको अनिवार्य गुणस्तर मापदण्डअनुसार प्रशोधित पिउने पानीमा कोलिफर्म शून्य हुनुपर्छ । फिकल कोलिफर्म दिशामा पाइन्छ । दिशामा पाइने सूक्ष्मजीव पानीमा भेटिनुलाई पिउन अयोग्य मानिन्छ ।

बिक्री–वितरणमा रोक लगाइएकामा ब्याच नम्बर–१३ को फ्रेस ड्रप, ब्याच नम्बर–१२ को अक्वा पिस, ब्याच नम्बर–६ को कोलभोतेश्वर, अक्वा डिवी, अक्वा माइल्ड, अक्वा कपन, अक्वा गौरशंकर छन् ।