भोजपुर । हराएको ३५ वर्षपछि परिवारको सम्पर्कमा आएका प्रकाश तामाङ आफ्नै पुख्यौली थलो भोजपुरमा कृषि पेसामा संलग्न हुने भएका छन् । 

२५ दिनअघि नेकपा (एमाले)का स्थायी कमिटी सदस्य तथा कोसी प्रदेशका पू्र्वमुख्यमन्त्री शेरधन राईले तामाङसँगको भेटघाट गर्ने क्रममा आफू भोजपुरमा रहेका बुवाआमासँगै बस्ने बताएका थिए । भोजपुरको षडानन्द नगरपालिका–१०, थाप्लेगाउँमा तामाङका परिवार छ । उनको बुवाआमा अर्काकै जमिन जोतभाग गर्दै आएका छन् । 

पूर्वमुख्यमन्त्री राई र उनको धर्मपत्नी जाम्मु इन शेर्पाले भेट गर्ने क्रममा आफूलाई जमिनको आवश्यकता रहेको बताएका थिए । त्यतिबेला पूर्वमुख्यमन्त्री दम्पत्तिले तामाङलाई एक लाख रुपैयाँ सहयोग गर्दै उनको आवश्यकता अनुरुपको सहयोग गर्ने आश्वासन दिएका थिए । 

राईले गरेको प्रतिबद्धताअनुसार शुक्रबार तामाङले पाँच रोपनी तीन आना जमिन पाएका छन् । राई पत्नी शेर्पाको पहलमा तामाङलाई मालपोत कार्यालय भोजपुरमा सो जमिन लिखित पास गरिएको छ । राई पत्नी शेर्पाको नाममा रहेको सो जमिन पास गरेपछि तामाङको घरमा भेला भएर लालपूर्जा लगायतका सामग्री हस्तान्तरण गरिएको थियो । 

तामाङलाई लालपूर्जासहित एक थान हाते ट्याक्टर र एक हल गोरु हस्तान्तरण गरिएको थियो ।