काठमाडौं । यो साता धितोपत्र दोस्रो बजार कारोबारमा उच्च उतारचढाव देखियो । एक साताको अन्तरालमा बजार ६०.७७ अंकले बढेर १५०.७७ अंकले घट्यो । तर, समग्रमा बजार यो साता ९० अंकले घटेर २,४८६.७६ विन्दुमा बन्द भएको छ । गत साताको अन्तिम कारोबार दिन बजार २,५७६.७६ विन्दुमा थियो ।

नेप्से परिसूचक घटेसँगै कारोबार रकम पनि दैनिक घट्दै गएको छ । यो सातभरिको पाँच कारोबार दिनमा २६ अर्ब नौ करोड ७४ लाख रुपैयाँको सेयर कारोबार भयो । तर, गत साता तीन दिनमात्र कारोबार हुँदा पनि २३ अर्ब ३७ करोड चार लाख रुपैयाँको सेयर कारोबार भएको थियो ।

यस साताको आइतबार ११.५९ अंकले बजार बढेको थियो भने सोमबार ५९.०२ अंक र मंगलबार ५८.९४ अंकले बजार घटेको थियो । बुधबार भने बजार ४९.१८ अंकले बढेको थियो । साताको अन्तिम दिन भने बजार ३२.८१ अंकले घटेर २,४८६.७६ विन्दुमा बन्द भयो ।

यो साता कुल बजार पुँजीकरण पनि घटेको छ । साताको अन्तिम दिन कुल बजार पुँजीकरण ३९ खर्ब ५४ अर्ब १५ करोड कायम भएको छ । तर, गत साताको अन्तिम दिन कुल बजार पुँजीकरण ४० खर्ब ९७ अर्ब २५ करोड रुपैयाँ थियो ।

गत सात बजार तीन दिन नै घटेको थियो । भदौ ३० गते बजार ५०.७४ अंकले बजार घटेको थियो भने सोमबार ५७.०३ अंकले बजार घटेको थियो । त्यस्तै, असोज १ गते इन्द्रजात्रा भएका कारण काठमाडौं उपत्यका बिदा भएकाले सो दिन (मंगलबार) सेयर कारोबार भएन । असोज २ गते बुधबार भने बजार ४ अंकले घटेको थियो । गत साताको अन्तिम कारोबार दिन संविधान दिवसका कारण बजार बन्द भयो ।

त्यही पनि तीन कारोबार दिनमा २३ अर्बभन्दा बढीको सेयर खरिद–बिक्री भएको थियो ।

गत साताको तुलनामा यो साता अपर स्याङ्गे हाइड्रोपावर कम्पनीको सेयर मूल्य सर्वाधिक वृद्धि भएको छ । गत साता प्रतिकित्ता ७१८ रुपैयाँमा कारोबार भएको यस हाइड्रोपावरको सेयर मूल्य बढेर प्रतिकित्ता ८९४ रुपैयाँ ८० पैसा कायम भएको छ । यस कम्पनीको सेयर मूल्य प्रतिकित्ता २४.६२ प्रतिशतले वृद्धि भएको हो ।

सेयर मूल्य सर्वाधिक घट्नेमा सीईडीबी आइड्रोपावर डेभलपमेन्ट कम्पनीको भएको छ । यो कम्पनीको सेयर मूल्य २०.९६ प्रतिशतले घटेर प्रतिकित्ता एक हजार ५८० रुपैयाँ कायम भएको छ । यस कम्पनीको सेयर मूल्य गत सातको अन्तिम कारोबार दिन एक हजार ९९९ रुपैयाँ थियो ।