काठमाडौं । नेकपा (माओवादीकेन्द्र)का अध्यक्ष पुष्पकमल दाहाल 'प्रचण्ड'ले अनेरास्ववियु (क्रान्तिकारी)को राष्ट्रिय सम्मेलनमा गुटबन्दी नगर्न आग्रह गरेका छन् । सम्मेलनको उद्‌घाटन गर्दै प्रचण्डले सहमति नभए चुनावमा जान आग्रह गरे ।

“सक्नुहुन्छ, सहमति बनाउनुस् । सक्नुहुन्न, निर्वाचनबाट जानुस्,” उनले भने ।

आफूले अध्यक्ष यसलाई नै बनाउनुपर्छ भनेर व्यक्ति नतोकेको उनको भनाइ छ । “यसलाई जिताउनुपर्छ भनेर कसैलाई भनेको छैन । नेतृत्वको दाबी गर्ने सम्भव भएसम्म सबैलाई भेटेको छु । उहाँहरूको बुझाइ, भोलिको कुरा के हो भनेर सुनेको छु,” उनले भने ।

प्रचण्डले पार्टी कार्यालयमा विद्यार्थीले सहजीकरण गरिदिए हुन्थ्यो भनेमात्रै भूमिका खेल्ने कुरा भएको सुनाए । कसैले गुटबन्दी नगर्ने सहमति गरेको पनि उनले बताए । उनले अहिलेको सम्मेलन गुटबन्दीबाट पर जाने अवसर भएको समेत बताए । 

“गुट, स्वार्थ समूह बनाउने कुराले पार्टी आन्दोलन विद्यार्थी केहीलाई पनि भलो गर्दैन । हामीले धेरै दु:ख पाइसकेका छौँ । गुटबन्दीबाट पर जाने यो अवसर पनि हो,” उनले भने ।