काठमाडौं । आर्सनल तथा चेल्सीका पूर्वस्ट्राइकर ओलिभर जिरुडप्रेरित लस एन्जलसले स्पोर्टिङ कान्सास सिटीविरुद्ध ३–१ को जितसहित यूएस ओपन कपको उपाधि जितेको छ । 

जिरुड गत सिजनको अन्त्यसँगै एसी मिलान छाडेर मेजर सकर लिगको क्लबमा अनुबन्धित भएका थिए । खेलको ५३औँ मिनेटमा जिरुडकै गोलमा लस एन्जलसले अग्रता बनाएको थियो । तर, त्यसको सात मिनेटपछि नै स्पोर्टिङ कान्सासका एरिक टमीले गोल गर्दै खेल बराबरीमा ल्याएका थिए । 

अतिरिक्त समयमा ओमान क्याम्पस र केइ कमाराले गोल गरेपछि लस एन्जलसले ३–१ को जितसहित ओपनको उपाधि पक्का गरेको हो । “म यहाँ उपाधि जित्न र त्यसखाले फाइनल खेल्न आएको हुँ । पछिल्लो केही हप्ता हाम्रो यात्रा निकै कठिन रह्यो । तर, पनि हामी एकसाथ रहिरह्यौँ । हामी यो ट्रफी समर्थकका लागि पनि जित्न चाहन्थौँ,” जितपछि जिरुडले भने । 

फ्रान्सको राष्ट्रिय टिमबाट सबैभन्दा धेरै गोल गर्ने खेलाडीको कीर्तिमान बनाएका जिरुडले जुलाईमा अन्तर्राष्ट्रिय फुटबलबाट सन्यासको घोषणा गरेका थिए । उनले फ्रान्सबाट ५७ गोल गरेका छन् ।