काठमाडौं । चालु आर्थिक वर्ष २०८१/०८२ को दुई महिनामा अघिल्लो वर्षको तुलनामा विदेशी लगानी प्रतिबद्धता घटेको छ । उद्योग विभागका अनुसार चालु आर्थिक वर्षको साउन र भदौमा १२ अर्ब ९८ करोड रुपैयाँको विदेशी लगानी प्रतिबद्धता आएको छ ।

अघिल्लो वर्षको यसै अवधिमा करिब १४ अर्ब ६२ करोड रुपैयाँ प्रत्यक्ष विदेशी लगानी (एफडीआई) प्रतिबद्धता आएको थियो । त्यसको तुलनामा यस वर्षको दुई महिनामा एफडीआई प्रतिबद्धता करिब ११.२१ प्रतिशतले घटेको हो ।

यस प्रतिबद्धतामध्ये ५२ उद्योगका लागि ८६ करोड २५ लाख ६० हजार २०० रुपैयाँ बराबरको लगानी विभागको अटोमेटिक रुटबाट स्वीकृत भएको छ । बाँकी ९७ उद्योगका लागि १२ अर्ब १२ करोड रुपैयाँ विभागले स्वीकृत गरेको छ ।

विभागका अनुसार सुरुआतदेखि भदौ मसान्तसम्म विभिन्न देशबाट पाँच खर्ब ३३ अर्ब रुपैयाँ एफडीआई स्वीकृत भएको छ । यस अवधिमा विभिन्न क्षेत्रका ६ हजार पाँच सय ५५ उद्योग तथा परियोजनामा विदेशी लगानीको स्वीकृत गरिएको हो ।

साउनमा महिनामा करिब ९ अर्ब १५ करोड रुपैयाँ बराबरको विदेशी लगानी प्रतिबद्धता आएकोमा भदौमा घटेर करिब तीन अर्ब ८३ करोडमा झरेको हो ।