काठमाडौं । नेपालमा इन्टरनेट सेवा प्रदायक कम्पनीहरूको डाटाको तुलनामा मोबाइल डाटाको प्रयोग बढ्दै गएको देखिएको छ । नेपाल दूरसञ्चार प्राधिकरणले सार्वजनिक गरेको दूरसञ्चार क्षेत्रका सूचकसम्बन्धी पछिल्लो तथ्यांकले यस्तो देखाएको हो ।

गत चैतको तथ्यांकअनुसार डाटा सेवा लिने बजारमा मोबाइल ब्रोडब्यान्ड (मोबाइल डाटा)को हिस्सा ६६.२८ प्रतिशत थियो । खासगरी इन्टरनेट सेवा प्रदायक कम्पनीले उपलब्ध गराउने वार्यड (तारमार्फत)को इन्टरनेट सेवाको बजार हिस्सा ३३.६२ प्रतिशत थियो । वायरलेस इन्टरनेट सेवा लिनेको बजार हिस्सा ०.१० प्रतिशत मात्रै थियो ।

यस वर्ष (२०८१)को असारसम्म आइपुग्दा मोबाइल ब्रोडब्यान्डको हिस्सा ९१.७२ प्रतिशत पुगेको छ । इन्टरनेट सेवाप्रदायक कम्पनीहरूको हिस्सा खुम्चिएर ८.२६ प्रतिशतमा झरेको छ । यस्तै, वायरलेस इन्टरनेको बजार पनि ०.०२ प्रतिशतमा झरेको छ ।

अंकमा मोबाइल ब्रोडब्यान्ड सेवा लिनेको संख्या तीन करोड १२ लाख ११ हजार ७४ छ भने, वार्यड इन्टरनेट सेवा लिनेको संख्या २८ लाख १० हजार ७७१ र वायरलेस इन्टरनेट सेवा लिनेको संख्या ६ हजार ७३८ छ ।

यसरी फिक्स्ड वार्यडको हिस्सा ४२.१२, फिक्स्ड वायरलेसको ०.१० र मोबाइल ब्रोडब्यान्डको १०७.०२ प्रतिशत गरी जनसंख्याको तुलनामा इन्टरनेटको पहुँच १४९.२३ प्रतिशत पुगेको छ ।

कसका ग्राहक कति ?
मोबाइल ब्रोडब्यान्डतर्फ नेपाल टेलिकमका ग्राहकको संख्या दुई करोड २४ लाख २४ हजार २९ छ भने एनसेलका ग्राहकको संख्या ८७ लाख ८७ हजार ४५ छ । यो तथ्यांक मोबाइल डाटामार्फत इन्टरनेट चलाउनेमा नेपाल टेलिकमको हिस्सा ७१.८५ र एनसेलको २८.१५ प्रतिशत हो ।

वर्ल्डलिंक र टेलिकमका ग्राहक बढे
प्राधिकरणको तथ्यांकअनुसार इन्टरनेट सेवा प्रदायक कम्पनीका ग्राहकहरू घटेका छन् । गत चैतमा इन्टरनेट कम्पनीका कुल ग्राहक संख्या ३२ लाख ६७ हजार ७७७ थियो । असार महिनाको तथ्यांकअनुसार यो संख्या करिब तीन हजारले घटेर २८ लाख १७ हजार ५०९ पुगेको छ ।

समग्रमा इन्टरनेट कम्पनीका ग्राहक घटे पनि वर्ल्डलिंक र नेपाल टेलिकमका इन्टरनेट प्रयोगकर्ता भने बढेका छन् । गत चैतमा वर्ल्डलिंकका प्रयोगकर्ता आठ लाख ९९ हजार ४७९ रहेकोमा असारमा बढेर ९१ लाख ८७ हजार ७३३ पुगेका छन् । यस्तै, नेपाल टेलिकमका इन्टरनेट ग्राहक तीन लाख दुई हजार ८६ बाट बढेर तीन लाख १३ हजार ५४५ पुगेका छन् ।

सबैभन्दा धेरै बजार हुने पहिलो नम्बरमा वर्ल्डलिंकको हिस्सा ३२.६१ प्रतिशत पुगेको छ । डिश मिडिया नेटवर्कको ११.३५ र नेपाल टेलिकमको हिस्सा ११.१३ प्रतिशत पुगेको छ । यस्तै, सुबिसु केबलनेटको बजार हिस्सा ८.८८ प्रतिशत, भायनेटको ७.३७ प्रतिशत र क्लासिक टेकको ५.७९ प्रतिशत बजार हिस्सा छ ।

तेस्रो स्थानबाट भायनेट पाँचौँमा झरेको हो भने, सुबिसु छैटौँबाट चौथो स्थानमा उक्लेको छ । क्लासिक टेक चौथोबाट छैटौँमा झरेको छ भने पाँचौँ स्थानबाट टेलिकम तेस्रोमा उक्लेको हो ।