काठमाडौं । उपप्रधान एवं अर्थमन्त्री विष्णुप्रसाद पौडेलले बजार निरन्तर घटेपछि नेपाल स्टक एक्सचेन्ज (नेप्से)मै पुगेर तनाव व्यक्त गरेका छन् । मन्त्री पौडेलले बुधबार नेप्से कार्यालयमै पुगेर पुँजीबजारमा पछिल्लो समय उतारचढाव आएको भन्दै आफैँलाई प्रश्न सोध्ने गरेको बताए ।

“पुँजीबजारको दीगो र भरपर्दो विकासको पक्षमा सरकार छ । अहिले पुँजीबजारमा किन उतारचढाव आयो भन्ने प्रश्न मेरो मनमा उब्जिरह्यो । त्यसैले म यहाँ आएँ,” उनले भने, “किन ३० अर्बको कारोबार चार/पाँच अर्बमा झरेको छ ?, नेप्से इन्डेक्स ३०४० को विन्दुबाट २५०० को विन्दुमा किन झर्‍यो ? यसको उत्तर म आफैँसँग र मेरा राजस्व सचिव तथा नेप्सेका जिम्मेवार पदाधिकारीसँग खोजिरहन्छु ।”

उनले थप भने, “ब्याजदर घटिरहेको छ । कारोबार पनि घटिरहेको छ । यो त नहुनुपर्ने हो ।” आफूले र मन्त्रालयले पुँजीबजारलाई संवेदनशील तरिकाले हेरेको पनि बताए ।