काठमाडौं । यूईएफए च्याम्पियन्स लिगको पहिलो खेलमा जर्मन क्लब बायर्न म्युनिखले डायनामो जग्रेबविरुद्ध ९–२ को फराकिलो जित निकालेको छ । 

मंगलबार राति बायर्नको मैदान एलियन्ज रंगशालामा भएको खेलमा बार्यनलाई जित दिलाउन ह्यारी केनले चार गोल गरे । यस्तै, माइकल ओलिसेले दुई गोल थप्दा रफाइल गुइरेरो, लोरे साने र लियोन गोरेज्काले समान एक गोल थपे । 

डाइनामोका ब्रुनो पेट्कोभिच र टाकुया ओगिवाराले समान एक गोल फर्काए । 

खेलको १९औँ मिनेटमा केनले गोल गर्दै घरेलु टिमलाई अग्रता दिलाएका थिए । ३३औँ मिनेटमा गुइरेरोले गोल गर्दै घरेलु टिमको अग्रता दोब्बर बनाए । ३८औँ मिनेटमा ओलिसेले गोल गरेपछि बायर्नले पहिलो हाफमा ३–० को अग्रता बनाएको थियो । ४८औँ मिनेटमा पाहुना टिमका पेट्कोभिचले एक गोल फर्काए । त्यसको दुई मिनेटपछि ओगिवाराले दोस्रो गोल फर्काउँदै खेल ३–२ मा ल्याएका थिए । तर, यसपछि बायर्नले ६ गोल थप्दै सहज जित निकालेको हो ।

५७औँ मिनेटमा केनले गोल गर्दै बायर्नलाई ४–२ को अग्रतामा राखे । ६१औँ मिनेटमा ओलिसेको गोलमा बायर्नले अग्रतालाई ५–२ मा पुर्यायो । ७३औँ मिनेटमा केनले ह्याट्रिक पूरा गरे । ७८औँ मिनेटमा केनले चौथो गोल गर्दा बायर्नले अग्रतालाई ७–२ मा पुर्याएको थियो । 

८५औँ मिनेटमा सानेले बार्यनका निम्ति आठौँ गोल गरे । यस्तै, इन्जुरी समयमा गोरेज्काले गोल गरेपछि बार्यनले ९–२ को सहज जित निकालेको हो । 

जितसँगै तीन अंक जोडेको बार्यन तालिकाको शीर्ष स्थानमा उक्लिएको छ । पहिलो खेलमै फराकिलो हार व्यहोरेको डाइनामो तालिकाको पुछारमा छ ।