काठमाडौं । निबन्धकार तथा नियात्राकार युवराज नयाँघरेको निबन्धकृति ‘आगोको बीउ’ प्रकाशनमा आएको छ । नयाँघरेको यो १९औं कृति हो । यसभन्दा पहिले उनका नौ वटा नियात्रासंग्रह र १० वटा निबन्धका पुस्तक प्रकाशित भइसकेका छन् । 

नेपाली समाजको उपेक्षित पाटोलाई आफ्नो निबन्धको भावभूमि बनाउने नयाँघरे पोख्त मानिन्छन् । २०६५ सालमा आत्मपरक निबन्धसंग्रह ‘एक हातको ताली’ मा उनले मदन पुरस्कार पाएका थिए । त्यसको करिब १५ वर्षपछि आफ्नो आत्मपरक शैलीलाई अझ परिस्कार र परिमार्जन गर्दै ‘आगोको बीउ’ प्रकाशनमा ल्याएको युवराजले बताए ।

उनी भन्छन्, “समाजमा हरेक क्षेत्र अन्यौल, असहिष्णु र अस्तव्यस्त भएको छ । त्यसकै अन्तरमनलाई पर्गेलेर मैले यी निबन्धहरूको रचना गरेको हुँ ।”

यसभित्र २६ वटा आत्मपरक निबन्धहरू समावेश गरिएको छ । नयाँघरेको यो संग्रहलाई रत्न पुस्तक भण्डारले प्रकाशनमा ल्याएको हो ।