काठमाडौं । उपप्रधान एवं अर्थमन्त्री विष्णुप्रसाद पौडेलले कर प्रशासनमा उल्लेखनीय सुधार हुने गरी काम गर्न निर्देशन दिएका छन् । शुक्रबार लाजिम्पाटस्थित आन्तरिक राजस्व विभागको स्थलगत अवलोकनका क्रममा उनले यस्तो निर्देशन दिएका हुन् ।

उनले सरुवाबढुवा वा अरू कुनै प्रयोजनका निम्ति मन्त्रीलाई भेट्न कोही नआउन पनि आग्रह गरे । आफ्नो रुचि र चासो कर प्रशासनमा उल्लेखनीय सुधार र लक्ष्य पूरा गर्नेमा केन्द्रित रहेको उनले बताए ।

“कोही पनि साथीहरू सरुवाबढुवा, अरू कुनै प्रयोजनका निम्ति मन्त्रीकहाँ नआउनु होला,” उनले भने, “मन्त्रीको एउटा मात्रै रुचि र एउटा मात्रै चासो छ कि हाम्रो कर प्रशासनमा उल्लेखनीय सुधार होस् । र, लक्ष्य पूरा होस् ।”

उनले सरकारले लिएको राजस्व संकलनको लक्ष्य पूरा गर्न आवश्यक सहयोग उपलब्ध गराइने सुनाए । आन्तरिक राजस्व रणनीति कार्यान्वयनका निम्ति उनले जोड दिए ।

“त्यसका लागि तपाईंहरूलाई के सहयोग चाहिन्छ, त्यो सबै सहयोग दिन हामी तयार छौँ । सबै सहयोग प्राप्त गर्न सक्नुहुन्छ । त्यस हिसाबले अघि बढ्न आग्रह गर्दछु” उनले भने ।

उपप्रधानमन्त्री पौडेलले आन्तरिक स्रोत परिचालनलाई प्रभावकारी बनाउन कर प्रणालीलाई आधुनिकीकरण गर्ने, प्रविधिमैत्री जनशक्ति विकासलगायत काममा लाग्नुपर्ने बताए । उनले लक्षित राजस्व लक्ष्य पूरा गर्न पनि निर्देशन दिए । न्युज एजेन्सी नेपाल