काठमाडौं । अमेरिकाको लागि प्रस्तावित नेपाली राजदूत लोकदर्शन रेग्मीले आफू राजदूत नियुक्त भए अमेरिकी राष्ट्रपतिलाई नेपालको भ्रमण गराउने बताएका छन् ।

सोमबार संघीय संसद्को संसदीय सुनुवाइ समितिमा आफ्नो सुनुवाइका क्रममा कार्ययोजना प्रस्तुत गर्दै उनले अमेरिकी राष्ट्रपतिलाई संसद्‌मा सम्बोधन गर्ने वातावरण समेत मिलाउने जनाए ।

“अमेरिकी राष्ट्रपतिबाट नेपाल भ्रमण गर्ने र हाम्रो संघीय संसद्लाई सम्बोधन गर्ने कार्यक्रम आयोजना गर्न आवश्यक पहल गर्नेछु,” रेग्मलीले भने ।

नेपालको संघीय संसद् र अमेरिकी कंग्रेसबीच भ्रमणको आदान प्रदानका लागि आवश्यक समन्वय गर्ने पनि उनले जनाए ।

“अमेरिकी संसदीय सुनुवाइको आफ्नै विशेषता रहेको छ । यसबाट लाभ लिनका लागि हाम्रो संसदीय सुनुवाइ समिति र अमेरिकी कंग्रेसको सुनुवाइ समितिबीच भ्रमण आदान प्रदानको प्रबन्ध मिलाउन प्रयत्नशील रहने छु,” रेग्मीले आफ्नो योजना सुनुवाइका क्रममा सुनाए ।

नेपाललाई उपलब्ध गराउने सहायत वृद्धि गर्न, नेपाली उत्पादनलाई अमेरिकी बजारमा पु¥याउन, नेपालको हितमा काम गर्न आफू निरन्तर लागिपर्ने उनले बताए ।

सात दशकभन्दा बढी अवधिमा भएको अमेरिकी आर्थिक सहायता नेपालको आधुनिकीकरण र विकासका लागि ज्यादै महत्त्वपूर्ण रहेको उनले जनाए । रेग्मीले भने, “हाम्रो देशको विकासलाई आजको विश्व विकास मानकअनुसारको स्तरमा पुर्‍याउन अझ धेरै लगानी हामीलाई आवश्यक छ ।”

कृषि, ऊर्जा, पर्यटन, सूचना प्रविधि, भौतिक पूर्वाधार, शिक्षा, स्वास्थ्य जस्ता प्रमुख क्षेत्रहरूमा लगानी वृद्धि गर्नुपर्ने उनले बताए ।

नयाँ नयाँ प्रविधि ल्याइ नेपाली अर्थतन्त्रलाई उच्च वृद्धिको मार्गमा लग्न, रोजगारी सिर्जना गर्न, आय वृद्धि गर्न सबै प्रकारका गरिबी घटाउँदै निवारण गर्न र समृद्धि हासिल गर्न हालको अमेरिकी सहायतालाई आवश्यकता अनुसार परिचालन गर्नेगरी दोब्बर बनाउन आवश्यक रहेको उनले जनाए ।

“सोहौँ योजनामा प्रस्तावित योजनाहरू कार्यान्वयन गर्न यसबाट सहयोग पुग्ने छ । यसलाई मैले उच्च प्राथमिकतामा राखेर प्रयास गर्ने छु” रेग्मीले भने ।

नेपालमा लगानीको अनुकूल वातावरण रहेको जानकारी गराएर, प्रमुख संवाहक क्षेत्रहरुको बारेमा अमेरिकी लगानीकर्ताहरूलाई विभिन्न कार्यक्रमहरू गरेर तथा परियोजना प्रस्तावहरूको जानकारी दिएर आकर्षित गर्ने पनि उनले जनाए ।

“जलविद्युत्, नवीकरणीय ऊर्जा, सूचना प्रविधि, पर्यटन, जडीबुटी प्रशोधन, कृषि र भौतिक पूर्वाधार लगायतका क्षेत्रहरुमा प्रत्यक्ष वैदेशिक लगानी बढाउन सम्पर्क गर्ने छु, समन्वय र उत्प्रेरित गर्ने छु,” रेग्मीले भने ।