काठमाडौं । फिफा विश्वकप–२०२६ छनोट चरणमा अर्जेन्टिनाले दोस्रो हार व्यहोरेको छ । मंगलबार राति कोलम्बियाको स्टाडियो मेट्रोपोलिटानोमा भएको खेलमा विश्वकप च्याम्पियन समेत रहेको अर्जेन्टिना घरेलु टिमसँग २–१ ले निराश बनेको हो ।

घरेलु समर्थकमाझ कोलम्बियालाई जित दिलाउन यर्सन मास्क्वेरा र जेम्स रोड्रिगेजले गोल गरे । अर्जेन्टिनाका निकोलस गोन्जालेजले एक गोल फर्काए पनि टिमको हार टार्न सकेनन् ।

खेलको २५औँ मिनेटमा मास्क्वेराले गोल गरेपछि कोलम्बियाले पहिलो हाफभर अर्जेन्टिनाविरुद्ध अग्रता बनाएको थियो । तर, ४८औँ मिनेटमा गोन्जालेजको गोलमा अर्जेन्टिना पुनः खेलमा फर्कियो । 

६०औँ मिनेटमा रोड्रिगेजले कोलम्बियाको जितमा निर्णायक गोल गरे । रोड्रिगेजले भिडियो असिस्टेन्ट रेफ्री (भार) को सहयोगमा पाएको पेनाल्टीलाई गोलमा परिणत गरेका थिए ।

विश्वकपको दक्षिण अमेरिकी छनोटमा अर्जेन्टिनाको यो दोस्रो हार हो । अर्जेन्टिनाले यसअघि छनोटमा उरुग्वेसँग २–० को हार सामना गरेको थियो । हारका बावजुद अर्जेन्टिना तालिकाको शीर्ष स्थानमा छ । अर्जेन्टिनाले ८ खेल खेल्दा ६ जितसहित १८ अंक जोडेको छ । 

तालिकामा अर्जेन्टिनालाई पछ्याइरहेको कोलम्बिया १६ अंकसहित तालिकाको दोस्रो स्थानमा छ । छनोटमा कोलम्बिया हालसम्म अपराजित छ । कोलम्बियाले आठ खेल खेल्दा चारमा जित र चार खेलमा बराबरीको नतिजा निकालेको छ ।

मंगलबार राति नै भएका अन्य खेलमा बोलिभियाले चिलीविरुद्ध २–१ को जित दर्ता गर्यो । यस्तै, भेनेजुयला र उरुग्वेले भने गोलरहीत बराबरी खेल्दै अंक बाँडेका छन् ।