काठमाडौं । काठमाडौं कलिङ साहित्य महोत्सवको तेस्रो संस्करण सम्पन्न भएको छ । ललितपुरको होटल हिमालयमा चलेको दुईदिने महोत्सव 'नेपालः द गेटवे टू एसियन आर्ट, कल्चर एन्ड लिटरेचर' भन्ने मूल नाराका साथ सम्पन्न भएको हो । महोत्सवमा ५० भन्दा बढी सत्र चलाइएको थियो । 

कार्यक्रममा महाकवि डा. भुवन ढुंगानालाई यशस्वी साहित्य सम्मान र लक्ष्मी मुर्डेश्वर पूरी, सञ्जीव सान्याल र अच्यूत सामन्तलाई यशस्वी सम्मानबाट सम्मान गरिएको छ । यसैगरी, यशस्वी पुस्तक पुरस्कार २०८१ बाट पाँच विधामा ६ वटा पुस्तकलाई पुरस्कृत गरिएको छ ।

पुरस्कृत हुनेमा देवव्रतको कविता संग्रह 'अष्टमाको निधारबाट वाग्मती बग्छ', मुना चौधरीको उपन्यास 'लार' र मोमिला जोशीले आफ्नो गैरकाल्पनिक कृति 'प्रश्नहरू त बाँकी नै रहन्छन्' छन् ।

रोहिणी राणाको 'द नेपाल कुक बुक' (अङ्ग्रेजी) र यज्ञराज उपाध्यायको शोध कृति 'काली–कर्णालीको लोकसाहित्य तथा संस्कृति'लाई पनि सम्मान गरिएको थियो । प्रत्येक विजेताले जनही २० हजार रुपैयाँसहित पुरस्कार प्राप्त गरे ।

महोत्सवमा नेपाल, भारत, भुटान, श्रीलङ्का र अन्य दक्षिण एशियाली मुलुकका ३०० भन्दा बढी लेखकको सहभागिता रहेको थियो ।

चौथो संस्करण अर्को वर्ष २०२५ को सेप्टेम्बर १३ र १४ मा काठमाडौंमा आयोजना हुने तय भएको छ ।