काठमाडौं । यूईएफए नेसन्स लिग–ए को खेलमा जर्मनीले हंगेरीविरुद्ध ५–० को फराकिलो जित निकालेको छ । शनिबार राति भएको खेलमा जर्मनीलाई जित दिलाउन जर्मनीका पाँच फरक खेलाडीले गोल गरे । जर्मनीबाट निक्लास फुलक्रुग, जमल मुसियाला, फ्लोरियन विर्ट्ज, एलेसान्डर पाभ्लोभिच र काई हाभार्ट्जले गोल गरे ।

खेलको २७औँ मिनेटमा फुलक्रुगले गोल गरेपछि जर्मनीले पहिलो हाफमा १–० को अग्रता बनाएको थियो । दोस्रो हाफमा चार गोल थपेको जर्मनीले ५८औँ मिनेटमा मुसियालाको गोलमा अग्रता दोब्बर बनायो । ६६औँ मिनेटमा विर्ट्जको गोलमा जर्मनीले अग्रतालाई ३–० मा पुर्याएको हो । 

७७औँ मिनेटमा पाभ्लोभिचले जर्मनीको अग्रतालाई ४–० मा राखे । यस्तै, खेलको निर्धारित समय सकिन नौ मिनेट बाँकी रहँदा पाएको पेनाल्टीलाई हाभार्ट्जले सदुपयोग गरेपछि जर्मनीले ५–० को सहज जित निकालेको हो ।

लिग–ए का समूह ‘३’ मा रहेको जर्मनी तालिकाको शीर्ष स्थानमा छ । पहिलो खेलमै पराजित हंगेरी भने तालिकाको अन्तिममा छ । यो समूहमा जर्मनी र हंगेरीसँगै नेदरल्यान्ड्स र बोस्निया एन्ड हर्जगोभिना छन् ।

शनिबार राति नै भएको समूहको अर्को खेलमा नेदरल्यान्ड्सले बोस्नियाविरुद्ध ५–२ को फराकिलो जित निकाल्यो । पहिलो खेलमा जितसहित तीन अंक जोडेको डच टोली तालिकाको दोस्रो स्थानमा छ । बोस्निया भने तालिकाको तेस्रो स्थानमा छ ।