site stats
बाह्रखरी :: Baahrakhari
कला
Global Ime bankGlobal Ime bank
माइनस २५ डिग्री तापक्रममा खिचिएको थियो ‘साम्बाला’ 

काठमाडौं । चलचित्र ‘साम्बाला’ भदौ २८ देखि रिलिज हुँदैछ । मिन भामले निर्देशन गरेको यो चलचित्रको मुख्य भूमिकामा थिन्ले ल्हामो, कर्मा, सोनम तोप्द्न, तेन्जिङ डल्हालगायत छन् । 

‘साम्बाला’ बर्लिन फिल्म फेस्टिभलको प्रमुख प्रतिस्पर्धातर्फ छनोट भएको थियो । बर्लिनको प्रमुख प्रतिस्पर्धातर्फ छनोट हुने यो पहिलो नेपाली चलचित्र हो । 

लोकार्नो फिल्म फेस्टिभलमा छनोट भएको यो चलचित्रले अवार्ड समेत जितेको थियो । अभिनेत्री थिन्लेले उत्कृष्ट अभिनयका लागि ‘बोक्कालिनो डिओर’ जितेकी थिइन् । 

‘साम्बाला’ उच्च हिमाली क्षेत्रमा खिचिएको चलचित्र हो । डोल्पाको माथिल्लो बेल्टमा खिचिएको चलचित्र चार हजार मिटरभन्दा माथि छायांकन भएको थियो । 

माइनस २५ डिग्री सेल्सियस तापक्रममा पनि चलचित्र खिचिएको निर्देशक मिनले बताएका छन् । “यो चलचित्र हामीले माइनस २५ डिग्री सेल्सियसमा पनि खिचेका छौँ । अधिकांश समय तापक्रम माइनस २० देखि २५ हुन्थ्यो,” मीन बाह्रखरीसँग भन्छन्, “घाम लागेको समय दिउँसो बढीमा ५ डिग्री सेल्सियस हुन्थ्यो ।” 

‘साम्बाला’ गत वर्षको मे र जुनमा डोल्पामा खिचिएको थियो । थुप्रै ग्रान्ट जितेको चलचित्रको लगानी करिब १५ करोड रुपैयाँ रहेको मिनले बताएका छन् । 

चलचित्रले बहुपति प्रथाको पृष्ठभूमिमा तयार पारिएको कथा भन्छन् । मिन र अविनाशविक्रम शाहले चलचित्रको कथा लेखेका हुन् ।  
 
हराएको श्रीमान् खोज्न देवरलाई सँगै लिएर निस्किने क्रममा गर्ने यात्रा र यात्राका क्रममा उनीहरू दुईको जीवनमा आउने परिवर्तन चलचित्रको मुख्य कथा हो । 

यसैबीच, चलचित्र ‘साम्बाला’ हेर्न बलिउड निर्देशक अनुराग कश्यप र कलाकार नवाजुद्दिन सिद्दिकी नेपाल आउँदै छन् । ‘साम्बाला’को प्रिमियरमा सहभागी हुन उनीहरू नेपाल आउन लागेका हुन् । उनीहरू भाेलि बिहान काठमाडाैं आउने छन् ।

‘साम्बाला’ भदौ २३ गते काठमाडौंमा प्रिमियर हुँदैछ । उनीहरूलाई विशेष अतिथिका रूपमा बोलाइएको निर्माणपक्षले बताएको छ । 

प्रकाशित मिति: शुक्रबार, भदौ २१, २०८१  १५:२९
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro