काठमाडौं । संघीय मामिला तथा सामान्य प्रशासनमन्त्री राजकुमार गुप्ताले संघीय निजामती विधेयक पारित गराउन उच्च राजनीतिक तहमा छलफल गर्ने बताएका छन् ।

प्रतिनिधिसभाअन्तर्गतको राज्यव्यवस्था तथा सुशासन समितिको बिहीबारको बैठकमा उनले संघीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक समितिबाट पारित गराउन उच्च राजनीतिक तहसँग समन्वय गर्ने बताएका हुन् । समितिमा बिहीबारैदेखि उक्त विधेयकमाथिको सैद्धान्तिक छलफल प्रारम्भ भएको छ ।

विधेयकमा एक हजार ५८३ संशोधन प्रस्ताव रहेको उनले उल्लेख गरे । त्यसमाथि छलफल गर्दा दुई वर्ष बित्न सक्ने भन्दै उनले उच्च राजनीतिक तहसँग समन्वय गरेर निर्देशन लिने बताए । उनले यो विधेयकलाई प्राथमिकतामा राखेर अगाडि बढाउन समितिसमक्ष आग्रह गरे ।

“...यसलाई छलफलमा लगियो भने यो छलफल नै वर्ष, दुई वर्ष जान्छ । हामी उच्च राजनीतिक तहमा समन्वय गर्छौँ,” उनले भने, “उहाँहरूको निर्देशन लिन्छौँ । र, छलफल गरेर अगाडि बढ्छौँ ।”

मन्त्री गुप्ताले बाराको जितपुर सिमरा उपमहानगरपालिकाका प्रमुख प्रशासकीय अधिकृत उर्मिला काफ्लेको विदेश भ्रमण रोकेको भन्दै एक सांसदले प्रश्न गरेका थिए । प्रश्नको जवाफ दिँदै उनले काफ्लेले मन्त्रालयसँग समन्वय तथा सम्पर्क नगरेकाले बाध्य भएर भ्रमण रद्द गर्नुपरेको बताए । न्युज एजन्सी नेपाल