काठमाडौं । चलचित्र ‘देवी’को रेडकार्पेट प्रिमियर आयोजना गरिएको छ । प्रिमियरमा सिनेमा हेर्न अभिनेता कर्मा शाक्य, विशाल पहारी, अभिनेत्री मेनुका प्रधान, सृष्टि श्रेष्ठ, लुनिभा तुलाधर र निर्देशक सौरभ चौधरी लगायत कलाकारहरुको उपस्थिति थियो । 

शिल्पा मास्के, नाजिर हुसेन, गौरव पहारी, निरिक्षा घतानी र निर्देशक संजोग राई लगायत हल पुगेका थिए । 

प्रिमियरमा चलचित्र हेरेका अधिकांशले सिनेमा उत्कृष्ट बनेको बताएका छन् । निर्देशक सौरभ चौधरीले सिनेमा निकै राम्रो बनेको बताए । उनले ‘देवी’जस्तो कन्टेन्ट भएको चलचित्र निर्माण गर्ने हरेक मेकरको सपना हुने गरेको बताए । 

समाज र देशमा भैरहेको बलात्कारका घटना र त्यसमा देखिने कानुनको प्रभावलाई सिनेमाले सुक्ष्म रुपमा उठाएको उनले बताए । 

अभिनेत्री सृष्टि श्रेष्ठले पनि सिनेमाको विषयवस्तुले भावुक बनाएको बताइन् । “नेपालमा बलात्कार र महिला हिंसाको कानुन बलियो छ । तर, त्यसको प्रभावकारी कार्यान्वयनको जरुरी छ । यसलाई देवीजस्ता सिनेमाले सरकारलाई घचघच्याउन सफल हुने मेरो विश्वास छ,” उनले भनिन् । 

अभिनेत्रीद्वय लुनिभा तुलाधर र मेनुका प्रधानले पनि सिनेमा उत्कृष्ट बनेको बताए । यस्ता चलचित्रलाई धेरैभन्दा धेरै दर्शकले हेरेर बहसको रूपमा लैजानु पर्ने उनीहरूको भनाइ छ । 

अभिनेता कर्मा शाक्यले पनि ‘देवी’ले गहन विषयलाई उत्कृष्ट ढंगले प्रस्तुत गरेको बताए । 

क्राइम थ्रिलर जानरामा निर्माण भएको सिनेमाका निर्देशक सञ्जोग राई हुन् । सिनेमाको कथा निर्देशक राईले अजय गौतमसँग मिलेर लेखेका छन् । 

चलचित्रमा शिल्पा मास्के, गौरव पहारी, नाजिर हुसेन, टीका पहारी, प्रभाकर न्यौपाने, ध्रुव कोइराला, निरीक्षा घतानी, विशाल पहारी, निरु खड्कालगायतको अभिनय छ ।