काठमाडौं । उरुग्वेका फरवार्ड लुइस स्वारेजले अन्तर्राष्ट्रिय फुटबलबाट सन्न्यासको घोषणा गरेका छन् । स्वारेजले सोमबार राति अन्तर्राष्ट्रिय करियर अन्त्य गर्ने निर्णय गरेका हुन् ।

३७ वर्षीय स्वारेजले १७ वर्षसम्म उरुग्वेको प्रतिनिधित्व गरे । उनले देशबाट १४२ खेल खेल्दा ६९ गोल गरेका छन् । सन् २००७ मा राष्ट्रिय टिमबाट ‘डेब्यु’ गरेका स्वारेज उरुग्वेका उच्च गोलकर्ता समेत हुन् ।

सन् २०११ मा भएको कोपा अमेरिका उरुग्वेले जित्दा स्वारेज टिमका महत्त्वपूर्ण सदस्य थिए ।

“शुक्रबार मेरो अन्तिम खेल हुनेछ,” स्वारेजले भने, “मेरो लागि यही समय उपयुक्त लाग्यो । म अझै खेल्न चाहन्थेँ, तर चोटका कारण त्यो सम्भव हुँदैन ।”

आउँदो शुक्रबार मोन्टेभिडियोमा उरुग्वेले पाराग्वेको सामना गर्दै छ । त्यो सन् २०२६ फिफा विश्वकप छनोटअन्तर्गतको खेल हो । त्यसको चार दिनपछि उरुग्वेले भेनेजुएलासँग खेल्ने तालिका छ ।

हाल स्वारेज अमेरिकी क्लब इन्टर मियामीबाट व्यावसायिक फुटबल खेलिरहेका छन् । स्वारेजले मियामीसँग दुई वर्षको सम्झौता गरेका छन् ।