काभ्रेपलाञ्चोक । डेढ महिनाको अवधिमा काभ्रेपलाञ्चोकका नौ स्थानीय तहमा डेंगी संक्रमण फैलिएको छ । शुक्रबार (हिजो) एकैदिन ६ जनामा संक्रमण देखिएको जनस्वास्थ्य कार्यालय धुलिखेलले जनाएको छ ।

शुक्रबार पनौती नगरपालिकामा दुई पुरुष र एक महिला, बनेपा नगरपालिकामा एक महिला, मण्डनदेउपुर नगरपालिका र भुम्ल गाउँपालिकामा एक/एक पुरुषमा डेंगी संक्रमण देखिएको कार्यालय प्रमुख रागीश्री कक्षपति श्रेष्ठले जानकारी दिइन् ।

उनका अनुुसार, गएको साउनदेखि हालसम्म जिल्लामा ५७ जनामा डेंगी संक्रमण देखिएको छ । संक्रमितमध्ये २७ पुरुष र ३० महिला छन् । “शुक्रबार एकैदिन ६ जनामा डेंगी देखिएको छ, सचेतना कार्यक्रम बढाउँदै लैजान्छौँ । व्यक्ति आफैँ पनि सचेत बन्नुपर्दछ,” श्रेष्ठले भनिन् ।

बनेपा, पनौती र धुलिखेल नगरमा बढी संक्रमित छन् । बनेपा र पनौतीमा १३/१३ जना, धुलिखेलमा १२, भुम्लु गाउँपालिकामा आठ, नमोबुद्ध नगर र रोशी गाउँपालिकामा तीन/तीन, पाँचखाल, मण्डनदेउपुरमा दुई/दुई र तेमाल गाउँपालिकामा एक डेंगी संक्रमित रहेका प्रमुख श्रेष्ठले जानकारी दिइन् ।

गत आवमा जिल्लामा ४८७ जनामा डेंगी संक्रमण भएको थियो । कार्यालयमार्फत स्थानीयस्तरमा समन्वय गरी संक्रमण न्यूनीकरण गर्न विभिन्न सचेतनाका कार्यक्रम गरिएको श्रेष्ठले बताइन् । संक्रमण नियन्त्रण गर्न प्रत्येक शुक्रबार ‘१० बजे १० मिनेट’, ‘खोज र नष्ट गर’ अभियान सञ्चालन गर्दै आएको उनले जानकारी दिइन् ।

प्रमुख श्रेष्ठका अनुसार, डेंगीको उच्च जोखिममा रहेका नेपालका १० जिल्लामध्ये काभ्रेपलाञ्चोक पनि एक हो । लामखुट्टेको टोकाइबाट डेंगी लाग्ने भएकाले यसबाट जोगिन त्यसको टोकाइबाट बच्नुपर्ने उनले बताइन् ।

डेंगी भएमा एक्कासि उच्च ज्वरो आउने, पाँचदेखि सात दिनसम्म ज्वरो रहिरहने, सहन नसक्ने गरी टाउको दुख्ने, आँखाको नानी तथा पछिल्लो भाग दुख्नुका साथै ढाड, जोर्नी र मांसपेशी दुख्ने, शरीरमा बिमिरा आउने तथा वाकवाकी लाग्ने, पेट दुख्ने, नाक अथावा गिँजाबाट रगत बग्ने, शरीरमा रगत जेमेको दाग देखापर्ने तथा बेहास हुने लक्षण देखिन्छ ।

समयमै उचित उपचार नपाए बिरामीको मृत्यु समेत हुने भएकाले डेंगीको शंका लागेमा तत्काल स्वास्थ्यकर्मीको निगरानीमा बस्नुपर्ने जनस्वास्थ्य कार्यालय धुलिखेलले जनाएको छ । रासस