पोखरा । गण्डकी मेडिकल कलेजले नयाँ भवनको शिलान्यास गरेको छ । गण्डकी मेडिकल कलेज टिचिङ हस्पिटल एन्ड रिसर्च सेन्टर प्रालिले पोखरा–२७, रिठेपानीमा नयाँ भवन बनाउन लागेको हो । अस्पतालको सेवा तथा शिक्षण समेत एकैठाउँमा हुनेगरी निर्माण हुन लागेको अत्याधुनिक भवनको शिलान्यास अध्यक्ष खुमाप्रसाद अर्यालले गरेका हुन् ।

आफ्नै स्वामित्वमा रहेको जग्गामा बीडीएस, नर्सिङ तथा अन्य शैक्षिक कार्यक्रम सञ्चालन रहेको पुरानो भवननजिक करिब तीन अर्बको लगानीमा ७५० शैयाको अत्याधुनिक शिक्षण अस्पताल निर्माण गर्न लागेको हो ।

यस्तै, हस्पिटलले पोखरा–२७, छत्रेढुंगामा समेत करिब एक अर्बको लागतमा शैक्षिक भवनको समेत निर्माण सुरु गरेको अस्पतालका प्रमुख कार्यकारी अधिकृत डा. रवीन्द्रप्रसाद श्रेष्ठले बताए । उनले दुवै भवनको निर्माण कार्य करिब दुई वर्षभित्र निर्माण सम्पन्न गर्ने लक्ष्यसहित आज शिलान्यास गरिएको बताए ।

पोखरा महानगरपालिका–९ स्थित गण्डकी मेडिकल कलेजको अस्पतालबाट सेवा प्रदान गर्दै आए पनि पोखराको जनघनत्व बढ्दै गएपछि सेवाग्राहीको समेत चाप बढेपछि कम्पनीको स्वामित्वमा रहेको जग्गामा भवन बनाउन लागिएको बताए ।