विराटनगर । कोसी प्रदेशका मुख्यमन्त्री हिक्मतकुमार कार्कीले सुनसरीको कोसी गाउँपालिकामा निर्माणधीन कोसी ‘रिफ्रेसमेन्ट’ सेन्टर परियोजनाको अनुगमन गरेका छन् । सेन्टरको पहिलो चरणको काम पूरा भएको छ । पहिलो चरणमा केही भवनसहितका संरचना तयार भएको कोसी सरकारले जनाएको छ । 

प्रदेशको गौरवको आयोजना मानिएको यसको पहिलो चरणको काम भइरहेको छ । २२ विगाहा १२ कठ्ठा क्षेत्रफलमा निर्माणाधीन परियोजना कोसी ब्यारेज पूर्वपट्टी पूर्वपश्चिम राजमार्गसँगै छ । यसमा १७५ वटा बस पार्किङ गर्न मिल्छ । भित्रै पेट्रोल पम्प, चालकहरूका लागि विश्रामस्थल, स्वीमिङ पुल, प्रहरी चौकी, स्वास्थ्य चौकी, रेस्टुरेन्ट लगायतका संरचना निर्माण भइरहेको मुख्यमन्त्री तथा मन्त्रिपरिषद्को कार्यालयले जनाएको छ । 

बिहीबार रिफ्रेसमेन्ट सेन्टरको अनुगमन गर्दै मुख्यमन्त्री कार्कीले पहिलो चरणको काम चाँडै सम्पन्न हुने बताए । दोस्रो चरणको काम हुँदा स्थानीयको सहयोग आवश्यक हुने मुख्यमन्त्री कार्कीले बताए । पहिलो चरणका काम सम्पन्न गर्न ५७ करोड ९८ लाख लागत लाग्ने अनुमान गरिएको थियो तर, काम सम्पन्न गर्न भने ३० करोड ४३ लाखमा सम्झौता भएको छ । परियोजना सम्पन्न गर्न दुई अर्ब रुपैयाँ लाग्ने अनुमान गरिएको छ ।