काठमाडौं । गरिमा विकास बैंकले ‘दि बेस्ट बैंक इन एसेट्स क्वालिटी’ अवार्ड प्राप्त गरेको छ । भारतीय चेम्बर अफ कमर्सद्वारा भारतको नयाँ दिल्लीमा आयोजित दोस्रो ‘इमर्जिङ एसिया बैंकिङ कन्क्लेभ एन्ड अवार्ड’ कार्यक्रममा बैंक अवार्डबाट सम्मानित भएको हो ।

प्रतिस्पर्धामा बिम्स्टेकअन्तर्गतका देश नेपाल, भारत, बंगलादेश, श्रीलंका, भुटान र म्यानमारका बैंक तथा वित्तीय संस्थाको सहभागिता थियो । यो पुरस्कार कर्जा तथा अरू लगानीको गुणस्तर उत्कृष्ट रहेका बैंक तथा वित्तीय संस्थाले प्राप्त गर्ने गरेको बताइएको छ ।

अवार्डको प्राप्तिसँगै गरिमा विकास बैंकले प्रवाह गर्ने कर्जा तथा अरू लगानीको गुणस्तर उत्कृष्ट र सुरक्षित रहेको विश्वास बैंकले गरेको छ । कार्यक्रममा विकास बैंकका तर्फबाट प्रमुख कार्यकारी अधिकृत माधवप्रसाद उपाध्याय र ट्रान्जेक्सन बैंकिङ इकाई प्रमुख नकुल पौडेलको उपस्थिति रहेको बैंकले जनाएको छ ।

कार्यक्रममा आयोजित ड्राइभिङ इफिसिएन्सिस एक्रस दि भ्यालु चेन विषयक प्यानल छलफलमा विकास बैंकका सीईओ उपाध्यायले डेभलपमेन्ट बैंकर्स एसोसिएसन, नेपालको प्रतिनिधित्व गरेका थिए । उनले नेपालको बैंकिङ क्षेत्र, बैंकिङमा प्रविधिको प्रयोग र आगामी चुनौतीका सम्बन्धमा आफ्नो धारणा राखेका थिए ।

बैंकका प्रमुख कार्यकारी अधिकृत उपाध्यायसँगै बैंक अफ भुटानका प्रमुख कार्यकारी अधिकृत दोर्जी कादिन, स्टेट बैंक अफ इन्डियाका चिफ जनरल म्यानेजर राजीवरञ्जन प्रसाद र न्युजेन सफ्टवेयर टेक्नोलोजीका उपाध्यक्ष तथा दक्षिण एसिया व्यवसाय प्रमुख सुनील पण्डिता मुख्य वक्ता थिए ।

कन्क्लेभमा श्रीलंकाको केन्द्रीय बैंकका डेपुटी गभर्नर र बंगलादेशको केन्द्रीय बैंकका कार्यकारी निर्देशक पनि वक्ताका रूपमा सहभागी थिए । काठमाडौंको लाजिम्पाटमा केन्द्रीय कार्यालय रहेको गरिमा विकास बैंक लिमिटेडले काठमाडौं उपत्यकाभित्र २२ सहित देशभर १२३ शाखा कार्यालय, एक एक्सटेन्सन काउन्टर र ५० एटीएममार्फत ग्राहकलार्ई सेवा प्रदान गर्दै आएको जनाइएको छ ।