काठमाडौं । सेवामा राज्यले प्रवाह गर्ने हरेक डिजिटल सामग्री अपांगतामैत्री हुनुपर्नेमा सरोकारवालाले जोड दिएका छन् । अपांगता भएका युवाको डिजिटल प्रविधिमा पर्याप्त पहुँच नभएको भन्दै उनीहरूले यसबारे संघदेखि स्थानीय सरकारसम्म गम्भीर हुनुपर्नेमा जोड दिएका हुन् ।

गएको बिहीबार काठमाडौंमा आयोजित एक कार्यक्रममा राष्ट्रिय अपांग महासंघका महासचिव सुगम भट्टराईले अपांगताका प्रकार वृद्धि हुँदै गए पनि डिजिटल पहुँच उल्लेखनीय रूपमा नबढेको बताए ।

कार्यक्रममा सुस्त श्रवण, दृष्टिविहीन, तथा सिकाइसम्बन्धी अपांगता भएका सहभागीले अस्पताल, शैक्षिक संस्था, सरकारी कार्यालयलगायत क्षेत्रमा अपांगतामैत्री डिजिटल प्रणालीको प्रयोग नहुँदा सास्ती खेप्नुपरेको अनुभव सुनाएका थिए । अस्पतालका डिजिटल बोर्ड, सरकारी वेबसाइट, स्वास्थ्य तथा शिक्षाका सूचना सामग्री अपांगतामैत्री नहुँदा सेवा लिन समस्या भएको उनीहरूको गुनासो छ ।

राष्ट्रिय स्वास्थ्य शिक्षा सूचना तथा सञ्चार केन्द्रकी वरिष्ठ स्वास्थ्य शिक्षा प्रशासक शीला श्रेष्ठले विगत दुई वर्षदेखि स्वास्थ्य शिक्षाका सन्देशमूलक सामग्री सांकेतिक भाषामा समेत प्रसारण गर्न थलिएको बताइन् । तर, सबैखाले अपांगता भएका नागरिकलाई समेट्ने गरी सामग्री उत्पादन गर्न नसकिएको उनको भनाइ छ ।