काठमाडौं । नेपालमा बीवाईडीको एट्टो ३ को नयाँ संस्करण सार्वजनिक भएको छ । बीवाईडीको आधिकारिक वितरक साइमेक्स इङ्कले बीवाईडी एट्टो ३ औपचारिकरूपमा सार्वजनिक गरेको हो ।

कम्पनीले यसलाई स्पोर्टी इलेक्ट्रिक एसयूभी भनेको छ । यो गाडी सबैभन्दा बढी बिक्री हुनेमा परेको कम्पनीको दाबी छ ।

नेपाल भित्रिएको दुई वर्षभन्दा कम समयमै तीन हजार युनिटभन्दा बढी बीवाईडी एट्टो ३ नेपाली सडकमा गुडिरहेका कम्पनीको भनाइ छ ।

बीवाईडी एट्टो ३ को २०२४ संस्करण विशेषरूपमा अपग्रेड गरिएको र यसमा नयाँ फिचर थप गरिएको कम्पनीले जनाएको छ ।

गाडी आकर्षक कसमस ब्ल्याक कलर अप्सनमा समेत उपलब्ध छ । इन्टेरियरमा युनिक ब्ल्याक र ब्लू कलर स्किम पनि उपलब्ध रहेको साइमेक्सले जनाएको छ ।

गाडीको एक्सटेरियरमा रियर ब्याज अर्थात् पछिल्लो भागमा पहिले ‘बिल्ड योर ड्रिम’ ब्याज रहेकामा अब भने स्लिक खालको ‘बीवाईडी’ मात्र राखिएको छ ।

डी–पिलर पहिले ड्रागन स्केलजस्तै प्याटर्नसहित सिल्भर कलरमा रहेकामा अब भने स्टाइलिस ब्ल्याक कलरमा राखिएको कम्पनीले जनाएको छ।

बीवाईडी एट्टो ३ को इन्फोटेनमेन्ट सिस्टम पहिले १२.८ इन्च रहेकोमा अहिले १५.६ इन्चको उपलब्ध भएको छ ।

सुपेरियर ग्रिप र सबै टेरेन्समा राम्रो ह्यान्डलिङ प्रदान गर्न गाडीको दुवै भेरिएन्टमा हाई–पर्फमेन्स कन्टिनेन्टल टायर रहेको बीवाईडीले जनाएको छ ।

जोडियो बीवाईडी एप

नयाँ संस्करणको गाडी बीवाईडी एपसँग जोडिएको छ । यसबाट गाडीको रेन्ज र पावर लेभल चेक गर्न, टायर प्रेसर चेक गर्न र गाडीका ढोका तथा झ्याल बन्द भएको वा नभएको थाहा पाउन सकिन्छ ।

यस्तै, टाढैबाट गाडीको अवस्थिति पत्ता लगाउन, एसी सञ्चालन गर्न र गाडीको हर्न तथा लाइट नियन्त्रण गर्नसमेत सकिने कम्पनीले जनाएको छ ।