भर्जिनिया । भर्जिनियाको मनाससमा नेपाली महिला ममता काफ्लेको उनकै पतिले घरमै हत्या गरेको आशंका गरिएको छ । ममताका पति नरेश भट्टले एक नाबालककी आमा ममताको निकै बीभत्स रूपमा हत्या गरी प्रमाण लुकाएको शंका प्रहरीले गरेको छ ।

हत्या भएको करिब तीन सातापछि बिहीबार नरेशलाई प्रहरीले शंकास्पद अभियुक्तका रूपमा लिई पक्राउ गरेको थियो । प्रहरीले तयार गरेको विवरणमा पनि जुलाई ३० मै ममताको हत्या घरभित्रै भएको र प्रमाण लुकाइएको जनाइएको छ ।

उच्च डिजिटल र फोरेन्सिक प्रविधिको प्रयोगबाट गरिएको अनुसन्धानमा केही रगतका टाटा बाथरुम र कोठामा भेटिएको अनौपचारिक रूपमा सार्वजनिक विवरणले देखाएको छ । बेडरुममा समेत रगतका टाटा भेटिएको जनाइएको छ ।

शंकास्पद अभियुक्त नरेशले जुलाई ३० मा नजिकको वालमार्टबाट तीनवटा चक्कु किनेको, सरसफाइ गर्ने विभिन्न सामग्री पनि किनेको अनुसन्धानमा देखिएको छ । हत्यापछि प्रमाण नष्ट गर्न ती सरसफाइ सामग्रीको प्रयोग गरिएको शंका प्रहरीको छ ।

हालसम्म नरेशले अपराध स्वीकार गरेका छैनन् । उनी जमानतमा छुट्न नपाउने गरी प्रहरीले हिरासतमा राखेको छ ।

ममताको शरीर भने अझै भेटिएको छैन । शंकास्पद अभियुक्त नरेशले पनि प्रहरीलाई यसबारेमा जानकारी दिएका छैनन् । यसबारेमा प्रहरीले अनुसन्धान गरिरहेको छ ।

ममताका नाबालकलाई हेरविचारका निम्ति नियमानुसार समाजिक संस्थामा जिम्मा लगाइएको छ । ममताका माइती परिवारका सदस्य अमेरिका आउने तयारीमा रहेको बताइएको छ ।

नेपाली समुदाय तरंगित
यो बीभत्स घटनाले अमेरिका बस्ने नेपाली समुदाय तरंगित भएको छ । कैयौँले सामाजिक सञ्जालमा परिवारका समस्या लकाउनुभन्दा नियमानुसार समाधानतिर लाग्नु उचित हुने स्टाटस लेखेका छन् ।

पनौतीको सामान्य परिवारकी ममताले फेसबुकको चिनजानका भरमा नरेशसँग विवाह गरेकी थिइन् । ममताको माइती परिवारको पनौतीमा तरकारी पसल छ । उक्त परिवारनिकटका अनुसार, नरेशले अमेरिकाको सेनामा काम गरेर छिट्टै अवकाश लिएका थिए । सेनामा रहँदा उनी अफगानिस्तानमा पनि बसेको बताइएको छ ।

अमेरिकाको नियमानुसार सेनामा भर्ना भएपछि सजिलै यहाँको नागरिकता पाइन्छ । श्रीमतीलगायत परिवारका सदस्यलाई पनि अमेरिका ल्याउन पाइन्छ ।

ममतालाई श्रीमान् नरेश र उनको परिवारले विभिन्न प्रकारले पीडा दिने गरेको माइतीनिकटले बताएका छन् । एक नाबालक सन्तानकी आमा २८ वर्षीया पेसाले नर्स ममताले पनि केही महिनाअघि पतिले घरेलु हिंसा गर्ने हुँदा कसरी अलग हुन सकिन्छ भन्ने खालको स्टाटस लेखेकी थिइन् । अमेरिकामा उनको माइतीनिकट कोही पनि थिएनन् ।

अमेरिकामा काम, परिवार हेरचाह सजिलो हुँदैन । नाबालक सन्तान हुँदा त झनै कठिन हुन्छ । परिवारका सदस्यबीच राम्रो समन्वय नभए अझ कठिन हुन्छ ।

हाल नेपाली समुदायले सामाजिक सञ्जालमा समाज, परिवार भन्दै हिंसा सहेर बस्न नहुने सुझाव साझा गर्न थालेका छन् ।

एक वर्षअघि टेक्सस, डलासमा कृष्ण लामिछानेले आत्महत्या गरेका थिए । केही महिनाअघि चर्चित रक्तदाताले पनि आत्महत्या गरे । यी पनि घरेलु हिंसासँग सम्बन्धित थिए । नेपाली समुदायमा परिवारभित्र विस्तारै समस्या बढ्दै गएकाले यसबारेमा बहस सुरु भएको हो ।

ममताका बारेमा अमेरिकाका सञ्चारमाध्यमले पनि चासोका साथ समाचार दिएका थिए । बिहीबार सीएनएनले बालककी आमा ममता हराएको बारेमा लामो समाचार दिएको थियो । अन्य सञ्चारमाध्यमले पनि यसबारेमा समाचार दिएका छन् ।

स्थानीय प्रहरी र प्रशासनले पनि यो घटनालाई महत्त्वका साथ अनुसन्धान गरिरहेको छ । केही दिनयता नियमिति रूपमा जानकारीहरु पनि दिइरहेको छ ।

अदालतमा प्रहरीले अभियोगपत्र बुझाएको छ । त्यहाँ पनि घरमै हत्या गरेर विभिन्न रूपमा शरीर घिसारेको उल्लेख छ । स्थानीय नेपाली सञ्चारकर्मी गुणराज लुइँटेलले सामाजिक सञ्चालमा राखेको विवरणानुसार, अभियुक्त नरेश अदालतमा उपस्थित हुँदा टुलुटुलु सुनेर बसे । आफ्ना कुरा वकिलमार्फत मात्र भन्ने बताएर मौन बसे । अदालतले अभियुक्तलाई वकिल राख्ने सुविधा दिएको थियो । अदालतमा उपस्थित भएकाहरूले नरेशका हाउभाउले उनमा खुंखार हत्याराको संकेत मिलेको रूपमा लिएका थिए । हिमालयखबरबाट ।