काठमाडौं । सत्तारूढ दल नपाली कांग्रेसको केन्द्रीय समितिको बैठकमा सदस्यहरूले सरकारमा पार्टीको तर्फबाट प्रतिनिधित्व गर्ने मन्त्रीहरूले आफ्नो उपस्थितिलाई सशक्त बनाउनुपर्नेमा जोड दिनुपर्ने बताएका छन् ।

शुक्रबार बसेको पार्टीको केन्द्रीय समिति बैठकमा केन्द्रीय सदस्य र पूर्वपदाधिकारीहरूले सरकारमा सशक्त उपस्थिति देखाउन जोड दिएका हुन् । बैठकपछि सञ्चारकर्मीहरूसँग कुरा गर्दै पार्टीका प्रवक्ता डा. प्रकाशशरण महतले बैठकमा प्रस्तुत गरिएको विषयहरूमा छलफल जारी रहेको बताए ।

उनले समसामयिक विषयमा, सरकारमा पार्टीको तर्फबाट प्रतिनिधित्व गर्ने साथीहरूले आफ्नो उपस्थिति सशक्त देखाउने र प्रभावकारी भूमिका निर्वाह गर्नुपर्ने कुराहरूमा जोड दिइएको बताए । उनले गठबन्धनलाई सफल बनाउने, नेपाली कांग्रेसले महत्त्वपूर्ण भूमिका निर्वाह गर्ने विषयमा सदस्यहरूले मत जाहेर गरेको उल्लेख गरे ।

पार्टीबाट पदाधिकारी, संसद्, प्रधानमन्त्री कति पटक हुने भन्नेकुरा समय सान्दर्भिक नरहेको मत बढी आएको बताए । त्यस्तै, चुनावअघिको गठबन्धनको बारेमा पनि निर्वाचनताकाको आवश्यकताअनुसार सिद्धान्तमा रहेर गर्ने/नगर्ने कुराहरू टुंगो लगाउनुपर्ने आवाज सदस्यहरू थियो । बैठकमा नेताहरूले पार्टीले एक्लै जित्ने परिवेश बनाउनुपर्ने र पार्टीमा एकता कायम रहनुपर्ने बारेमा सदस्यहरूको जोड रहेको बताए ।