काठमाडौं । नेपाली कांग्रेसका नेता शशांक कोइरालाले २०८४ सालको निर्वाचनमा प्रमुख प्रतिन्द्वन्द्वी नेकपा (एमाले)का हुने भएकाले अब संगठनलाई बलियो बनाउनुपर्ने बताएका छन् । 

शुक्रबार नेपाली कांग्रेसको केन्द्रीय समितिको बैठकमा उनले कांग्रेसले अब ०८४ को निर्वाचनमा ध्यान दिनुपर्ने बताए ।

“२०८४ मा चुनाव हुँदै छ, त्यतातिर ध्यान दिनुपर्‍यो । जिल्ला जिल्लामा संगठनलाई बलियो पार्नुपर्छ,” कोइरालाले भने, “अब हाम्रो ध्यान ८४ को निर्वाचनमा जानुपर्छ । हाम्रो मुख्य प्रतिन्द्वन्द्वी हुन्छ, एमाले । हामीले संगठनमा ध्यान दिनुपर्छ ।”

सुरुमा एमालेसँग गठबन्धन गर्न नहुने पक्षमा आफू रहे पनि अहिले गठबन्धन राम्रो लागेको उनले बताए । तर, एमालेसँग गठबन्धन भइरहँदा धेरै सतर्क हुनुपर्ने उनको भनाइ छ ।

“यो पनि फेल भयो भने सम्पूर्ण राष्ट्र नै फेल हुन्छ । यो गठबन्धनले पनि डेलिभर गर्न सकेन भने, सुशासनको बारेमा, भ्रष्टाचारीको बारेमा मूल्यांकन गर्न सकेन भने । तसर्थ, यो अन्तिम अवसर हो । यसलाई हामीले खेर फाल्नु हुँदैन,” कोइरालाले भने ।

उनले अगाडि भने, “हाम्रो सत्रु, सत्रु त नभनौँ, हाम्रो प्रतिपक्ष, मुख्य प्रतिपक्ष को हो– एमाले हो । उसँग नै हात मिलाएर हामीले सरकारमा आएका छौँ । यो अन्तिम अवसर हो, हाम्रा लागि । यो अन्तिम अवसरलाई हामीले गुमाउन भएन ।” 

उनले पार्टी सभापति शेरबहादुर देउवालाई संगठन निर्माण र महिलाहरूलाई अगाडि बढाउन सुझाव दिए ।