विराटनगर । कोसी प्रदेशमा मन्त्रालय फुटाएपछि मात्र नेपाली कांग्रेस सरकारमा सामेल हुने भएको छ । 

अहिले कोसीमा ९ मन्त्रालय छन् । कम्तीमा दुई मन्त्रालय थप भएपछि मन्त्रालयको संख्या ११ पुग्ने छ । मन्त्रालय फुटाएर भए पनि कांग्रेसलाई सरकारमा सामेल गराउने मुख्यमन्त्री हिक्मत कार्कीले यसअघि नै संकेत गरेका थिए । मुख्यमन्त्री तथा मन्त्रिपरिषद्को कार्यालयमा पत्रकार सम्मेलन गरी उनले भौतिक पूर्वाधार विकास मन्त्रालय फुटाउन सकिने बताएका थिए ।

“कुल बजेटको ठूलो हिस्सा एउटै मन्त्रालयमा रहँदा कार्यसम्पादन चुस्त र बजेट कार्यान्वयनमा समेत समस्या हुँदो रहेछ, यसलाई विभाजन गर्न सकिन्छ,” कार्कीको भनाइ थियो ।

यद्यपि, पहिलो कार्यकालमा मुख्यमन्त्री छँदा सरकारको प्रशासनिकदेखि अन्य खर्च घटाउने उद्घोष गर्दै उनै मुख्यमन्त्रीले मन्त्रालय एक आपसमा एकीकृत गरेर घटाएका थिए ।

कोसीमा आर्थिक मामिला तथा योजना, भौतिक पूर्वाधार विकास, आन्तरिक मामिला तथा कानून, स्वास्थ्य, खानेपानी, सिँचाइ तथा ऊर्जा,सामाजिक विकास, उद्योग, कृषि तथा सहकारी, पर्यटन, वन तथा वातावरण मन्त्रालय छन् । भौतिक पूर्वाधार मन्त्रालय फुटाएर सहरी विकास तथा उद्योग कृषि र सहकारीबाट उद्योग झिकेर अलग मन्त्रालय बनाउनेबारे छलफल भएको बताइएको छ ।

कार्की नेतृत्वको सरकारमा रहेका माओवादीले केन्द्रीय गठबन्धन फेरिएपछि सरकार छाडेको छ । उसले छाडेका मन्त्रालयमा थप गरी चारवटा कांग्रेसलाई दिने सरकारको तयारी थियो । तर, कांग्रेसमा मन्त्री बन्ने अकांक्षी धेरै भएपछि मन्त्रालय थप गर्ने तयारी भएको हो । सांसद संख्याको आधारमा कोसीमा १३ वटासम्म मन्त्रालय बनाउन सकिन्छ ।

०७९ पुस २५ गते मुख्यमन्त्री नियुक्त हुँदा कार्की मन्त्रिपरिषद्को पहिलो निर्णय नै मन्त्रालय संख्या घटाउने थियो । तर, अहिले दलगत भाग पुर्‍याउनकै लागि मन्त्रालय संख्या थप गर्न लागेका हुन् ।

मुख्यमन्त्री राजेन्द्र राईको कार्यकालमा कोसीमा भागबन्डा मिलाउनकै लागि मन्त्रालय संख्या बढाएर १३ बनाइएको थियो । त्यसबेला सहरी विकास र कृषि तथा सहकारी मन्त्रालय अलग्गै बनाइएको थियो । आन्तरिक मामिला तथा कानून मन्त्रालयबाट झिकेर यातायात तथा सञ्चार मन्त्रालय पनि थप गरिएको थियो । 

देउवा र ओलीले मन्त्रालय मिलाउने

मन्त्रालयको भागबन्डा नपुगेर कोसीमा कांग्रेसले अर्घेल्याइँ गरेजस्तै गण्डकीमा एमाले सरकारमा सामेल भएको छैन । दुई प्रदेशको लफडा मिलाउन तल प्रदेशका संसदीय दलले नसकेपछि यसको छिनोफानो गर्ने जिम्मेवारी शीर्ष नेतालाई छाडिएको छ ।

नेपाली कांग्रेस कोसी संसदीय दलका नेता उद्धव थापाका अनुसार कांग्रेस सभापति शेरबहादुर देउवा र प्रधानमन्त्री केपी शर्मा ओलीबीच यस विषयमा दुईपटक छलफल भइसकेको छ ।

कोसीमा कांग्रेस संस्थापन र शेखर कोइराला समूहले दुई–दुई मन्त्रालय दाबी गर्दै आएका छन् । सिटौला समूहको एउटा मन्त्रालयमा दाबी छ । पहिले नै मुख्यमन्त्री बनिसकेका उद्धव थापा र केदार कार्कीबाहेक २७ जना सांसदले मन्त्री बन्न इच्छा देखाएका छन् । को को मन्त्री बन्ने भन्ने छलफल नै अघि बढेको छैन । तर, मन्त्री बन्न चाहनेले काठमाडौमा पार्टीगत लबिङ बढाएका छन् ।

कोसी र गण्डकीमा उस्तै प्रकृतिको राजनीतिक समस्या देखिएकाले समस्या समाधान गरेर मात्र सरकार विस्तार हुने कांग्रेस संसदीय दलका नेता थापाको भनाइ छ ।