काठमाडौं । लघुकथा समाज नेपाल, काठमाडौंले १७औँ लघुकथा दिवसको थालनी विशेष अन्तर्क्रियात्मक कार्यक्रमका साथ गरेको छ । हरेक वर्ष भदौ ५ गतेलाई समाजले लघुकथा दिवसका रूपमा मनाउँदै आएको छ ।

मंगलबार काठमाडौंको अनामनगरमा आयोजित कार्यक्रममा समाजका सल्लाहकारहरू साहित्यकार अशेष मल्ल, समालोचक प्रा.डा. लक्ष्मणप्रसाद गौतम तथा समाजका संस्थापक अध्यक्ष श्रीओम श्रेष्ठ रोदनले लघुकथाको लेखन प्रवृत्तिमाथि आफ्ना विचार राखे । तीनैजना सर्जकले लघुकथाको स्तरीयताप्रति चिन्ता व्यक्त गरे ।

साहित्यकार तथा नाट्यकर्मी अशेष मल्लले लेखनको संख्यात्मक दृष्टिकोणले हेर्दा लघुकथाको क्षेत्र निकै उर्बर देखिए पनि, लेखकले राम्रो र स्तरीय लघुकथा लेख्नुभन्दा भटाभट लेखेर किताब छापिहाल्ने हतारमा रहेको टिप्पणी गरे । उनले भने, “किताब छाप्ने हतार गर्नुभन्दा राम्राराम्रा लघुकथा लेखेर त्यसमा पनि छनोट गरेर केही पछि मात्रै किताब प्रकाशन गर्दा राम्रो हुन्छ । त्यसले परिणाम राम्रो दिन्छ ।”

समालोचक तथा साहित्यकार प्रा.डा. लक्ष्मणप्रसाद गौतमले आजको समयमा लघुकथा लेखकहरू सचेत हुनुपर्नेमा जोड दिए । उनले लघुकथा लेखेर चर्चित हुनुभन्दा राम्रो सिर्जना गरेर प्रतिष्ठित हुने कुरा सर्जकले सोच्नु पर्ने बताए । उनले भने, “चर्चाको आयु फेसबुक जत्तिकै हुन्छ, २४ घण्टा । अर्को स्टाटस पोस्ट गर्नासाथ अघिल्लो हराउँछ ।”

साहित्यकार श्रीओम श्रेष्ठ रोदनले लघुकथाको कमजोरी भनेको सामाजिक सञ्जाल भएको उल्लेख गरे । उनले भने, “सामाजिक सञ्जालकै कारण लघुकथाको ‘ल’ पनि नबुझ्नेहरू लघुकथाकार भएका छन् । यसले लघुकथालाई कमजोर बनाउँदै लगेको छ ।”

समाजका अध्यक्ष तथा भाषा आयोगका सदस्य साहित्यकार गोपाल अश्कले लघुकथा समाजले आउँदा दिनमा लघुकथाको उन्नयनका लागि केही स्मरणीय कामहरू गर्ने जानकारी गराए ।

नेपाल स्रष्टा समाजका संरक्षक पवन आलोकले समाजले गरेको यो अन्तर्क्रियात्मक कार्यक्रम प्रभावकारी भएको बताए ।

कार्यक्रममा प्रदीप सापकोटा, तारा केसी, शुष्मा चित्रकार, रामकुमार पण्डित, सिन्धु गौतम र सुमन सौरभले आआफ्ना लघुकथा वाचन गरे । समाजले भदौ ५ गते सर्वनाम नाट्यघरमा विशेष कार्यक्रम आयोजना गरी लघुकथाका सर्जकहरूलाई सम्मानित गर्दै छ ।