काठमाडौं । स्पेनिस ला लिगा नयाँ सिजनको पहिलो खेलमा एट्लेटिको मड्रिड र भियारियालले २–२ गोलको बराबरी खेल्दै अंक बाँडेका छन् । सोमबार स्टाडियो डे ला सेरामिकामा भियारियालले दुईपटक अग्रता बनाए पनि त्यसलाई जोगाउन सकेन ।

१८औँ मिनेटमा अर्नाउट डान्जुमाले गोल गर्दै भियारियाललाई अग्रतामा राखेका थिए । यो अग्रता लामो समय टिक्न सकेन । त्यसको दुई मिनेटपछि नै मार्कोस लियोरेन्टले गोल गर्दै एट्लेटिकोलाई खेलमा फर्काए ।

३७औँ मिनेटमा एट्लेटिकोका कोकेबाट आत्मघाती गोल उपहार पाएपछि भियारियालले पुनः २–१ को अग्रता बनाएको थियो । तर, पहिलो हाफको इन्ज्युरी समयमा एलेक्सान्डर सोरिओथले गोल फर्काउँदै एट्लेटिकोलाई पुनः बराबरीमा ल्याएका थिए ।

नयाँ सिजनको पहिलो खेलमै रोकिएको एट्लेटिको एक अंकसहित तालिकाको आठौँ स्थानमा छ । समान अंकको भियारियाल पाँचौँ स्थानमा छ ।