काठमाडौं । राष्ट्रियसभाका सांसद वामदेव गौतमले प्रधानमन्त्रीसँग भेट्न नपाइने गुनासो गरेका छन् । आइतबार राष्ट्रियसभा बैठकमा उनले यस्तो बताएका हुन् ।

“सरकारका प्रमुख व्यक्तिसँग कुरा गर्दा हुने विषय हो, सरकारका माथिल्लो तहका प्रधानमन्त्रीसँग भेट गर्न पाइँदैन । त्यसैले राष्ट्रियसभा गुहारेको छु,” उनले भने ।

गौतमले ०७३–०७४ मा नेपालका लागि तत्कालीन इजरायली राजदूतसँग नेता विष्णु पौडेलको निवासमा भएको भेटबारेको प्रसंग सुनाए । भेटका क्रममा तत्कालीन इजरायली राजदूतले बाटो बनाउन गिटी, बालुवा नचाहिने गरी आफूहरूले केमिकलको विकास गरेको बताएको उनले सुनाए ।

“हामीले धेरै समय खर्च गरेर विटुमिनको ठाउँमा अर्को एउटा केमिकल विकास गरेका छौँ, जसले तपाईंहरूको जस्तो देशमा बाटोलगायतको निर्माणका निम्ति मद्दत गर्न सक्छ । त्यो सयौँ वर्षसम्म बिग्रन्न, भत्कन,” राजदूतको भनाइ उद्धृत गर्दै गौतमले भने, “गिटी पनि चाहिन्न, बालुवा पनि चाहिन्न । जति ठाउँमा त्यो केमिकल जान्छ, त्यो माटो आफैँ चट्टानजस्तो रूपमा प्रकट हुन्छ । गाडी सजिलै दौडन सक्छन् । यस्तो गरी विकास गरेका छौँ भनेर उहाँले भन्नुभयो ।”

उक्त केमिकल ल्याएर प्रयोग गर्न सके पहाड, नदीनाला सुरक्षित हुन सक्ने उनले बताए । त्यसका निम्ति इजरायललाई अनुरोध गरिनुपर्नेमा उनले जोड दिए ।

“इजरायलका राजदूतलाई बोलाएर परराष्ट्रमन्त्रीले कुरा गर्नुपर्‍यो । आवश्यक पर्छ भने प्रधानमन्त्रीले पनि कुरा गर्नुपर्‍यो,” उनले भने, “नेपालको समृद्धि र विकासका निम्ति त्यो विषय नेपालमा ल्याउनुपर्‍यो ।”