काठमाडौं । धितोपत्र दोस्रो बजार मापक नेप्से परिसूचक आइतबार घटेर बन्द भएको छ । नेप्से परिसूचक ३४.४७ अंकले घटेर २९६६.३३ विन्दुमा बन्द भएको हो ।

यस दिन नेप्से घटेसँगै होटेल तथा पर्यटन समूहका लगानीकर्ताले सर्वाधिक गुमाएका छन् । यो समूहमा पर्ने ६ वटैै कम्पनीको सेयर मूल्यमा गिरावट आउँदा समग्र परिसूचक ४.४९ प्रतिशतले घटेको छ ।

यो समूहअन्तर्गत चन्द्रागिरि हिल्स, सिटी होटेल, कालिञ्चोक दर्शन, ओरेन्टियल होटेल, सोल्टी होटेल र तारागाउँ रेजेन्सी होटल पर्छन् । यी सबै कम्पीको सेयर मूल्य ३ प्रतिशतभन्दा बढीले घटेको नेपाल स्टक एक्सचेन्ज (नेप्से)ले जनाएको छ ।

कारोबारमा आएका १३ मध्ये वाणिज्य बैंक, जीवन बिमा, म्युचुअल फन्ड र निर्जीवन बिमा समूहको परिसूचक बढेको छ । वाणिज्य बैंक ०.८४, जीवन बिमा ०.०१, म्युचुअल फन्ड ०.३८ र निर्जीवन बिमा समूहको परिसूचक ०.४६ प्रतिशतले वृद्धि भएको छ ।

आइतबार २८ अर्ब ८३ करोड ६९ लाख रुपैयाँको सेयर खरिद–बिक्री भएको छ । गएको बिहीबार हालसम्मकै उच्च मूल्यको सेयर कारोबार भएको थियो । त्यस दिन २९ अर्ब ९५ करोड रुपैयाँको सेयर कारोबार भएको थियो ।

आज ४७ कम्पनीको सेयर मूल्य बढेको छ । १९७ कम्पनीको सेयर मूल्य घटेको छ । राष्ट्रिय बिमा कम्पनी, लाइफ इन्स्योरेन्स कर्पाेरेसन (नेपाल), मल्टीपर्पस फाइनान्स र सम्पदा लघुवित्त वित्तीय संस्थाको सेयर मूल्य १० प्रतिशतले वृद्धि भएको छ ।

नेपाल फाइनान्सको सेयर मूल्य १० प्रतिशतले घटेको छ । सगरमाथा जलविद्युत् कम्पनी, न्यादी हाइड्रोपावर, शुभम पावर, मातृभूमि लघुवित्त वित्तीय संस्था, मिड सोलु हाइड्रोपावर र कुथेली बुखरी हाइड्रोपावर कम्पनीको सेयर मूल्य ७ प्रतिशतभन्दा बढीले घटेको छ ।