काठमाण्डौं । गृहमन्त्री रमेश लेखकले हमासको अपहरणमा परेका नेपाली विद्यार्थी विपिन जोशीको रिहाइका लागि सहयोग गरिदिन कतारलाई विशेष आग्रह गरेका छन् ।

बिहीबार नेपालका लागि कतारका राजदूत मिसाल बिन मोहम्मद अल अन्सारीसँगको भेटका क्रममा गृहमन्त्री लेखकले विपिनको रिहाइका लागि आग्रह गरेका हुन् ।

राजदूत अलान्सारी गृहमन्त्रीलाई भेट्न सिंहदरबार पुगेका थिए । भेटमा उनले नेपाल र कताबीचको गहिरिँदै गएको सम्बन्धबारे चर्चा गरे ।

गृहमन्त्री लेखकले विपिनको रिहाइका साथै कतारमा रहेका नेपाली कामदारलाई २४ घण्टा नै बिमाको व्यवस्था तथा कतारमा रहेर मृत्यु एवं घाइते भएका नेपालीहरूको राहत र उद्धारमा जोड दिए । उनले विभिन्न जेलमा सजाय भोगिरहेका नेपाली नागरिकलाई आममाफी तथा सजाय छुट व्यवस्था मिलाइदिन पनि आग्रह गरे ।

त्यसैगरी, राजदूत अलान्सारील विपिनको रिहाइका लागि कतारले आवश्यक पहल गरिरहेको जानकारी दिए ।