काठमाडौं । नेपाल प्रहरीले शनिबार जुवाखालबाट पक्राउ गरेका मध्ये एकजना कोसी प्रदेशसभा सदस्य रहेको खुलेको छ । प्रहरीले जुवाखालबाट ११ जनालाई पक्राउ गरेको हो । तीमध्ये कोसी प्रदेशसभा सदस्य बुद्धिकुमार राजभण्डारी एक हुन् ।

उनी सोलुखुम्बु क्षेत्र नम्बर–१ ‘ख’बाट प्रदेशसभा सदस्यमा निर्वाचित भएका थिए । नेकपा (एमाले)का नेता उनी कोसी प्रदेशका पूर्वमन्त्री समेत हुन् ।

उनीसँगै पक्राउ पर्नेमा हास्यटेलिशृंखला ‘सक्किगोनि’का कलाकार पुरुषोत्तम आचार्य समेत छन् । ‘सक्किगोनि’मा आचार्य प्रहरी इन्स्पेक्टरको भूमिकामा देखिँदै आएका छन् । उनी नेपाल प्रहरीका पूर्वइन्स्पेक्टर भएको स्रोतले जानकारी गराएको छ ।

काठमाडौं महानगरपालिका–८, गौरीघाटबाट उनीहरूलाई पक्राउ गरिएको हो । प्रहरीका अनुसार, काभ्रेको बनेपा नगरपालिका–१२ का ४१ वर्षीय राजु महतको गौरीघाटस्थित कोठामा उनीहरू जुवातास खेलिरहेका थिए । महतलाई पनि प्रहरीले पक्राउ गरेको छ ।

सोही जुवाखालबाट एमाले सोलुखुम्बका अरू नेता पनि पक्राउ परेका छन् । उनीहरूका साथबाट नगद एक लाख ७० हजार रुपैयाँ र १६ बुक तास बरामद गरिएको छ । उनीहरूलाई प्रहरी वृत्त गौशालामा राखिएको छ ।