काठमाडौं । धितोपत्र दोस्रो बजारमा सेयर किनबेच गर्न लगानीकर्ता ब्रोकर कम्पनीको भर पर्नुपर्छ । तर, केही लगानीकर्ताको ट्रेड मेनेजमेन्ट सिस्टम (टीएमएस)मा समस्या देखिँदा पनि ब्रोकरले बेवास्ता गरेको पाइएको छ ।

यसरी लगानीकर्ताको समस्यामा बेवास्ता गर्नेमा नेपाल स्टक हाउस प्रालि (ब्रोकर नम्बर १४) हो । यस ब्रोकरका सेवाग्राहीहरूको टीएमएसमा समस्या आएको र खबर गर्दा पनि समस्याको हल नखोजिएको एक लगानीकर्ता बताउँछन् ।

ती लगानीकर्ताले कुमारी बैंक, हिमालयन बैंक, रिडी पावर र शिवम् सिमेन्टको सेयर बेच्न खोज्दा समस्या देखिएको बताएका छन् । 
ब्रोकरलाई समस्याबारे जानकारी गराउँदा आफ्नो पक्षबाट नभएर भेन्डर कम्पनी वाइकोबाटै समस्या भएको जानकारी दिँदै पन्छिएको ती लगानीकर्ता बताउँछन् । आफ्नो मात्र नभएर अरू लगानीकर्ताको पनि यस्तो समस्या देखिएको उनको दाबी छ ।

टीएमएसको ‘ब्रेकर ब्याक अफिस’को डीपी होल्डिङमा सीडीएस फ्री ब्यालेन्स र टीएमएस ब्यालेन्समा ‘म्याचिङ’ भएको उनी बताउँछन् । आफ्नो डिम्याट खातामा भएको सेयर टीएमएसमा शून्य देखिएको उनी बताउँछन् ।

बेच्न खोज्दा पनि बेच्न नमिलेको उनको भनाइ छ । ब्रोकरलाई यो समस्या सुनाउँदा ब्रोकरले नेप्से र वाइकोलाई देखाएर पन्छिएको उनको भनाइ छ । सेयर बजारका खेलाडीहरूले चलखेल गरेर केही कम्पनीको सेयरलाई माथि उचाल्ने र आफ्नोमात्र बेच्न यो चाल चालेको हुन सक्ने उनको आशंका छ ।

तर, आफ्ना ब्रोकरका सेवाग्राहीमा यस्तो समस्या नआएको नेपाल स्टक हाउसका प्रमुख कार्यकारी अधिकृत (सीईओ) विनोद दाहाल बताउँछन् । 

उनले कुनै पनि सेवाग्राहीले यस्तो समस्याबारे जानकारी नगराएको बताए ।

“हाम्रा सेवाग्राहीको टीएमएसमा कुनै समस्या आएको भए यहाँ जानकारी गराउनुपर्ने हो । तर, कुनै जानकारी आएको छैन,” उनले बाह्रखरीसित भने, “यदि समस्या आएको भए लगानीकर्ताले ब्रोकरलाई भन्नुपर्ने हो । हामी वाइकोसँग कुरा गरेर हल खोज्थ्यौँ ।”

नेपाल स्टक एक्सचेन्ज (नेप्से)का प्रवक्ता मुराहरि पराजुली पनि टीएमएसमा समस्या नआएको बताउँछन् । टीएमएसमा समस्या आएको भए यति धेरै कारोबार सम्भव नहुने भनाइ उनको छ । एक–दुई लगानीकर्तामा समस्या आएको भए उनीहरूले ब्रोकरसँग समाधान खोज्नुपर्ने उनको भनाइ छ । ब्रोकरले पनि नेप्से र वाइकोको समस्या भनेर पन्छिन नहुने उनी बताउँछन् ।

उनी भन्छन्, ‘‘वाइको एउटा सेवा प्रदायक संस्था भएकाले ब्रोकरले यस्ता संस्था फेर्न सक्छन् । ब्रेकरले राम्रोसँग सेवाग्राहीको समस्या पहिचान गरेर हल गर्नुपर्छ ।’’