काठमाडौं । बंगलादेशमा शेख हसिना सत्ताच्युत भएसँगै त्यहाँका अल्पसंख्यकमाथि आक्रमण हुन थालेका समाचार बाहिरिएका छन् । करिब १७ करोड जनसंख्या रहेको बंगलादेशमा ९१ प्रतिशत मुस्लिम धर्मावलम्बी छन् ।

बंगलादेशको दैनिक पत्रिका ‘द डेली स्टार’का अनुसार हसिनाले बंगालदेश छाडेकै दिनमा बंगलादेशका २७ जिल्लामा हिन्दु धर्मावलम्बीका घर तथा व्यापारिकस्थलमा हमला तथा लुटपाट भएको थियो । बंगलादेशको अन्तरिम सरकारको नेतृत्व गरिरहेका मोहम्मद युनुसले पनि अल्पसंख्यकमाथिको आक्रमण रोक्न आग्रह गरेका छन् ।

युनुसको आग्रहका बाबजुद बंगलादेशमा हिन्दु धर्मावलम्बीका घर, मन्दिर र व्यावसायिक स्थानमा हमला नरोकिएको ‘द डेली स्टार’ पत्रिकाले लेखेको छ ।

आक्रमण, लुटपाट नरोकिएपछि बंगलादेशका सयौँ हिन्दुहरू भारत जानका लागि बंगलादेश भारत सीमा क्षेत्रमा जम्मा भएका छन् । बंगलादेश र भारत दुवैले सीमा क्षेत्रमा कडाइ गरेका कारण सुरक्षा खोज्दै भारत जान खोजिरहेका हिन्दुहरू बंगलादेशको सीमामै रोकिएको ‘द डेली स्टार’ पत्रिकाले उल्लेख गरेको छ । ‘बीबीसी’ले पनि बंगलादेशमा हिन्दुहरूमाथि आक्रमण भइरहेको समाचार लेखेको छ ।

‘बीबीसी’का अनुसार बंगलादेशका अल्पसंख्यक हिन्दुहरूमाथि यतिखेर निरन्तर आक्रमण भइरहेको छ । उनीहरूका घरमा आगो लगाइएको, लुटपाट मच्चाइएको छ । बंगलादेशमा अल्पसंख्यकका घर, धार्मिकस्थल र व्यापारिक स्थानमा भइरहेको लुटपाट, आक्रमण र तोडफोड भइरहेको कुरा भारतका विदेशमन्त्री एस जयशंकरले २२ साउनमा भारतका दुवै सदनलाई जानकारी गराएका थिए ।

खलिदा जिया नेतृत्वको बंगलादेश नेसनलिस्ट पार्टीका कार्यवाहक अध्यक्ष तथा जियाका छोरा तारिख रेहमानले सामाजिक सञ्जाल ‘एक्स’मार्फत अल्पसंख्यकमाथिको आक्रमण रोक्न अपिल गरेका छन् । त्यस्तै, विश्व हिन्दु महासंघको बंगलादेश शाखाले बंगलादेशमा हिन्दुहरूमाथि भएका घटनाको विवरण सार्वजनिक गरेको छ ।

बंगलादेशमा अल्पसंख्यक र विशेष गरी हिन्दुहरूमाथि आक्रमण भइरहँदा नेपालमा पनि विभिन्न हिन्दु संघ संस्थाले विरोध जनाएका छन् । मधेसका जिल्लाहरूमा विभिन्न हिन्दु संघसंस्थाले विरोध र्‍याली निकालेका छन् । मधेसका वीरगञ्ज, जनकपुर लगायतका सहरमा विरोध र्‍याली निकालिएको प्रहरीले बताएको छ ।

विश्व हिन्दु परिषद्को नेपाल शाखाले विज्ञप्ति जारी गर्दै बंगलादेशमा भइरहेको हिंसाप्रति खेद प्रकट गरेको छ । त्यस्तै, हिन्दु राष्ट्र स्वाभिमान जागरण अभियानले बंगलादेशमा मारिएका अल्पसंख्यकहरूको सम्झनामा शनिबार (२६ साउन) काठमाडौंको माइतिघरमा श्रदाञ्जली सभा आयोजना गर्दै छ । यसका साथै अभियानले बंगलादेशमा भइरहेको अल्पसंख्यकमाथिको हिंसा रोक्न माग गर्दै संयुक्त राष्ट्रसंघको नेपालस्थित कार्यालयमा ज्ञापन पत्र बुझाउने बताएको छ ।

बंगलादेशमा चर्किएको साम्प्रदायिक विवादको तनाव नेपालमा देखिन नेपाल प्रहरीले उच्च सुरक्षा सतर्कता अपनाएको छ । यसअघि विभिन्न निहुँमा सुनसरीको धरान, सर्लाहीको मलंगवा, बाँकेको नेपालगञ्जमा साम्प्रदायिक तनाव भड्किएको थियो ।

बंगलादेशको निहुँमा तराई मधेसमा हुन सक्ने सम्भावित साम्प्रदायिक तनावलाई ख्याल गर्दै प्रहरी केन्द्रीय कार्यालयले आफ्ना सातवटै प्रदेश कार्यालयलाई उच्च सतर्कता अपाउन निर्देशन दिएको छ ।

नेपाल प्रहरीका प्रवक्ता डीआईजी दानबहादुर कार्की भन्छन्, "हामीले सबै प्रदेशका हाम्रा कार्यालयलाई धार्मिक सद्भाव कायम राख्ने काम गर्नू भनेर निर्देशन दिएका छौँ । उच्च सतर्कता अपनाउन पनि निर्देशन दिएका छौँ । सबै प्रदेशका प्रहरी कार्यालयले पनि धार्मिक सद्भावका लागि अपिल गरेका छन् ।"

यसबाहेक साम्प्रदायिक तनाव भड्किन सक्ने संवेदनशील स्थानमा उच्च सुरक्षा सतर्कता अपनाइएको प्रवक्ता कार्कीले बताए । उनले भने, "तराई–मधेसका केही स्थानहरू संवेदनशील छन् । त्यस्ता स्थानमा हामीले त्यही अनुसार सुरक्षा सतकर्ता बढाएका छौँ ।"

बंगलादेशमा अल्पसंख्यकहरूमाथि भरहेको हिंसाका विरोधमा तराई–मधेसमा विरोध र्‍याली निकालिए पनि अहिलेसम्म अप्रिय घटना नभएको प्रवक्ता कार्कीले बताए । "अहिलेसम्म नेपालमा त्यस्तो अप्रिय घटना भएको छैन । त्यस्तो घटना नहोस् भनेर नेपाल प्रहरी सचेत छ ," उनले भने ।