काठमाडौं । राष्ट्रियसभाका सांसदहरूले डेंगी र हैजा संक्रमणलाई महामारीको रूपमा फैलिन नदिन अन्तरमन्त्रालय समन्वयमा जोड दिएका छन् । संघीयता सशक्तीकरण तथा राष्ट्रिय सरोकार समितिको बिहीबार बसेको बैठकमा सांसदहरूले स्वास्थ्यमन्त्री प्रदीप पौडेललाई यस्तो सुझाव दिएका हुन् ।

बैठकमा सांसदहरूले खानेपानी, भौतिक पूर्वाधार, वातावरण लगायतका मन्त्रालयसँग समन्वय गरी खानेपानी शुद्धीकरणको काम तत्काल अघि बढाउन मन्त्रीलाई सुझाव दिएका थिए ।

सांसद राजेन्द्रलक्ष्मी गैरेले काठमाडौं उपत्यकालाई लक्षित गरी वितरण केन्द्रहरू फिल्टर गर्ने व्यवस्था मिलाउनुपर्ने बताइन् । 

उपत्यकाको अव्यवस्थित र असुरक्षित खानेपानी नै हैजा फैलिनुको प्रमुख कारण भएको सांसदहरूको निष्कर्ष छ ।

“हैजामात्रै होइन, बर्खायाममा अन्य संक्रमणजन्य रोगहरूको पनि उत्तिकै जोखिम छ । त्यसैले शुद्ध पिउने पानीका निम्ति खानेपानी, ढल विकास कुन कुन निकायसँग समन्वय गर्नुपर्छ गरौँ,” सांसद किरणबाबु श्रेष्ठले भने ।

संक्रमणजन्य रोगबारे पूर्वतयारी र नियन्त्रणका निम्ति स्वास्थ्य मन्त्रालयले विशेष योजनासहितका काम अघि बढाउनुपर्ने सांसद कृष्णबहादुर रोकायाको जोड छ ।

बैठकमा स्वास्थ्यमन्त्री पौडेलले हैजा देखिएका र नदेखिएका स्थानमा पनि निरन्तर पानीको नमुना परीक्षणको काम भइरहेको जानकारी दिए । खानेपानी विभागसँग पनि मन्त्रालयले समन्वय गरिरहेको उनले बताए । 

पानीका स्रोतहरूमा दिसामा पाइने 'फिकल इकोली' मिसिएकै कारण हैजा अनपेक्षितरूपमा फैलिएको उनको भनाइ छ ।

मन्त्रालयका अनुसार १९ जुलाईयता ७ अगस्तसम्म देशभर ३६ जनामा हैजा संक्रमण पुष्टि भएको छ । सबैभन्दा धेरै ललितपुरमा २५ जना संक्रमित भएको तथ्यांक छ ।