काठमाडौं । युरोपेली फुटबल महासंघ (यूईएफए)ले स्पेनिस कप्तान अल्भारो मोराटा र मिडफिल्डर रोड्रीलाई एक खेलका निम्ति प्रतिबन्ध गरेको छ । युरो २०२४ को उपाधिपछि ‘जिब्राल्टर स्पेन हो’ भन्ने नारा लगाएको भन्दै उनीहरूलाई कारबाही गरिएको हो ।

जिब्राल्टर फुटबल एसोसिएसन (जीएफए)ले यसबारे यूईएफएमा उजुरी गरेपछि छानबिन थालिएको थियो । यी दुई खेलाडी स्पेनले सर्बियाविरुद्ध खेल्दा टिममा उपलब्ध हुने छैनन् । स्पेनले सेप्टेम्बर ५ मा सर्बियासँग खेल्ने तालिका छ ।

स्पेनले युरो २०२४ को फाइनलमा इंग्ल्यान्डलाई २–१ ले हराउँदै उपाधि जितेपछि रोड्रीले ‘जिब्राल्टर स्पेन हो’ भन्ने नारा लगाएका थिए । कप्तान मोराटाले प्रोत्साहन गरेका थिए ।

“यस प्रकृतिका व्यवहारका निम्ति फुटबलमा कुनै स्थान छैन,” यूईएफएले जारी गरेको विज्ञप्तिमा उल्लेख छ ।

जिब्राल्टर सन् २०१३ देखि यूईएफको पूर्ण सदस्यको बनेको थियो ।