काठमाडौं । औषधि व्यवस्था विभागले अनलाइन फार्मेसी सञ्चालनका निम्ति छुट्टै मापदण्ड तयार पारेको छ । विभागले अनलाइन औषधि बिक्री वितरण मापदण्ड, २०८१ को मस्यौदा तयार पारेर सरोकारवालासँग सुझाव मागेको छ ।

मापदण्ड कम्प्युटर सफ्टवेयरमार्फत औषधि बिक्री गर्न दर्ता भएका फर्म तथा पसललाई लागु हुनेछ । 
यस्ता पसल औषधि व्यवस्था विभागमा अनिवार्य दर्ता हुनुपर्ने छ । साथै, आफ्नै भौतिक पसलसमेत हुनुपर्ने मापदण्डमा उल्लेख छ  ।

अनलाइन फार्मेसीले लागु वा विषालु औषधि बिक्री वितरण गर्न पाउने छैनन् । बिक्रीका निम्तिसमेत लाइसेन्सप्राप्त फर्मासिस्ट हुनुपर्ने छ । १८ वर्षमुनिका बालबालिकालाई औषधि बिक्री गर्न पाइने छैन ।

पेस्क्रिप्सन अनुसारको औषधि बिक्री गर्दा डेलिभरी गर्ने व्यक्तिको नामथर, फार्मेसीको परिषद् नम्बर, व्यवसायी नम्बर उल्लेख गरी छाप लगाउनुपर्ने छ । 

ग्राहकले अनलाइनमार्फत औषधिबारे इन्क्वायरी गर्दा लाइसेन्सप्राप्त परामर्शदाताले परामर्श दिनुपर्ने मापदण्डमा उल्लेख छ ।

अनलाइन फार्मेसीले भौतिकसरह कारोबार, बिल बिजक, लेबलिङसम्बन्धी सबै कागजातको अभिलेख राख्नुपर्ने छ । 

अनलाइन वा कुनै पनि माध्यमबाट आउने ग्राहकका गुनासो सुनुवाइ तथा राय सल्लाहका निम्ति छुट्टै संयन्त्र बनाउनुपर्ने छ । औषधि भण्डारण सुरक्षित र मापदण्ड अनुसार हुनुपर्ने छ । 

अनलाइन फार्मेसीले औषधि र औषधिजन्य सामानबाहेक अन्य कुनै पनि वस्तु बिक्री वितरण गर्न पाउने छैनन् । यस्ता फार्मेसीको मापदण्ड र गुणस्तरबारे विभागले नै नियमन गर्ने छ । 

मापदण्डको मस्यौदामा उल्लेख भएका यी प्रावधान तथा अन्य सुझावका निम्ति विभागले सरोकारवालहरूलाई १० दिनभित्र सुझाव दिन भनेको छ ।

हेर्नुहोस् मापदण्ड